Për shkak të temperaturave të larta që kanë përfshirë vendin tonë, Ministria e Shëndetësisë të premten ka marrë vendim që të kufizohet orari i punës deri më datën 20 korrik, për gratë shtatzëna dhe për punëtorët e sektorit të ndërtimtarisë.
Një lexues i Prishtinapress ka dërguar foto dhe video ku shihen punëtorët duke punuar pavarësishtë se me vendim është ndaluar te punohet në sektorin e ndërtimtarisë nga ora 11:00 deri 17:00 për shkak te temperaturave te larta, shkruan PrishtinaPress.
Më poshtë vendimi i Ministrisë së Shëndetësisë:
1. Nga data 13.07.2024 deri më 20.07.2024 lirohen nga puna gratë shtatzëna.
2. Në rast të pamundësisë së lirimit nga puna sipas paragrafit 1 të këtij vendimi, gratë shtatzëna punojnë nga shtëpitë.
3. Nga data 13.07.2024 deri më 20.07.2024 qytetarët me sëmundje kronike punojnë me orar të shkurtuar deri në 4 orë në ditë.
4. Nga data 13.07.2024 deri më 20.07.2024 ndalohet puna në sektorin e ndërtimtarisë në ambiente të hapura gjatë orarit 11:00 – 17:00 në të gjithë territorin e Republikës së Kosovës.
5. Varësisht prej temperaturave që mbizotërojnë gjatë muajit korrik dhe gusht 2024, ndërmerren masa të tjera.
6. Vendimi hyn në fuqi ditën e nënshkrimit.
Ky vendim është marrë duke pasur parasysh praktikat më të mira për mbrojtjen e shëndetit dhe sigurisë së punëtorëve gjatë periudhave me temperatura të larta.
Këshilla dhe rekomandime për t’u mbrojtur nga nxehtësia dhe temperaturat e larta kanë dhënë edhe Instituti Kombëtar i Shëndetit Publik.
IKSHPK ka kërkuar që qytetarët të shmangin daljet jashtë dhe po ashtu të mos bëjnë aktivitete të rënda gjatë kohës më të nxehtë të ditës.
