“Mua po ma merr mendja se pas intervistimit të Thaçit në Speciale, sigurisht dikush ka rënë në përgjim [shokët e tij apo kush nuk e di] – kjo me hamendje. Ata më thanë që t’i kufizoj lëvizjet e mia dhe të qëndroj në shtëpi derisa të merren hapa të mëtutjeshëm”.
Të mërkurën (22 korrik, 2020) Gani Geci nga Lidhja Demokratike e Kosovës përmes një videoje që ka postuar në llogarinë e tij në Facebook, ka bërë të ditur se ka marrë informatë nga disa vende mike të Kosovës që merren me siguri, se jeta e tij mund të jetë në rrezik.
Geci ka bërë një rrëfim rreth informatës që ka pranuar ku i është thënë që t’i kufizoj lëvizjet e tij.
“Unë dje kam qenë në Prishtinë dhe rreth orës 18:00 është thirrur vëllai ynë Nehati dhe i është kërkuar numri im i telefonit nga disa miq që merren me çështjen e sigurisë”.
“Më kanë thirrur dhe më kanë thënë se duhet të lidhemi edhe me disa persona tjerë – 4 persona. Ata më thanë që sipas informatave të tyre, mua me duhet t’i kufizoj lëvizjet e mia”.
“Mua po ma merr mendja se pas intervistimit të Thaçit në Speciale, sigurisht dikush ka rënë në përgjim [shokët e tij apo kush nuk e di] – kjo me hamendje. Ata më thanë që t’i kufizoj lëvizjet e mia dhe të qëndroj në shtëpi derisa të merren hapa të mëtutjeshëm”.
“Ata që më kanë njoftuar janë persona kredibil për siguri, nuk është një informatë pa lidhje. Dy prej tyre i njoh – disa kanë punuar edhe më herët në raste të shokëve të mi në vitin 2001”.
I pyetur rreth se mundësisë që ky rrezik të ketë lidhje me “Komunikatën numër 59”, Geci nuk e ka përjashtuar një gjë të tillë.
“Në këto vitet e fundit, ekziston një kërkim falje e Thaçit dhe një reagim i Selimit. Mendoj se edhe ajo mund të jetë një prej elementeve kryesore që është hetuar në Hagë sepse njëri thotë ndryshe dhe tjetri ndryshe”.
Geci thotë se në kohën e fundit është ballafaquar me disa faqe në Facebook të cilat janë marrë me propagandë kundër tij.
“Masat e sigurisë i kemi shtuar, mu friku nuk e kemi njet. I kemi shtuar masat e sigurisë edhe si familje edhe unë personalisht. Janë të njoftuar edhe KFOR-i, janë të njoftuara edhe organet e tjera të hetuesisë”, ka thënë ai për Klanin.
“Unë askujt në Kosovë nuk ia kam shtyrë mexhën as nuk ia kam rrahur qenin. Kundërshtitë kanë ardhur për shkak se ne kemi mbështetur Rugovën më të gjitha fuqitë që kemi pasur. Në vitin 2001 është organizuar një pritë kundër meje dhe krejt këto janë për shkak të bindjeve politike”.