Zëvendësministri i Ministrisë Tregtisë dhe Industrisë Faton Thaçi, në konferencën e mbajtur sot me temë: “Promovimi i Punësimit në Sektorin Privat” tha se duke iu falënderuar përfaqësuesve të Agjencisë se Zvicrës për Zhvillim dhe Korporatë (SDC), për bashkëpunimin e deritanishëm në nxitjen dhe Promovimin e Punësimit në Sektorin Privat, ku deri më tani kemi kaluar fazën e parë të projektmarrëveshjes dhe duke e ditur rëndësinë që sektori privat, që zë vend në zhvillimin ekonomik si promotor kyç, qeveria e Kosovës përkatësisht Ministria e Tregtisë dhe Industrisë në dy vitet e fundit, në kuadër të bashkëpunimit të aktiviteteve të përbashkëta, nëpërmjet Agjencisë për Promovim KIESA dhe PPSE kanë organizuar panairet si: Panairi i ushqimit Slow Food në Cyrih dhe mbështetja e panairit të ushqimit SIAL në Paris.
Thaçi falënderoi ambasadorin zviceran z. Lebet, për bashkëpunimin e mëtejmë në nxitjen e punësimit në sektorin privat dhe ndihmën e vazhdueshme që ka dhënë për Kosovën shteti helvetik.
Thaçi tha se Qeveria e Republikës së Kosovës, konkretisht MTI, politikat e saj në zhvillimin ekonomik i ka orientuar konkretisht në përkrahjen, stimulimin dhe mbështetjen ligjore në zhvillimin e sektorit privat dhe investimeve të huaja, si gjenerator kryesor i rritjes ekonomike, punësimin dhe zhdukjes së varfërisë.
Me tutje, Thaçi tha se objektivat e MTI-së, gjatë kësaj faze, do të jenë në mbështetjen e sektorit privat në fushën e prodhimit, ku ne si ministri, me vëmendje të posaçme, kemi ndërmarrë hapa të prekshëm për të krijuar legjislacionin e nevojshëm konform rregullave të BE-së, duke lehtësuar ambientin afarizmit në Republikën e Kosovës, që nga faza e regjistrimit të biznesit, lehtësirat fiskale e deri tek masat mbrojtëse për produktet e këtyre prodhuesve. E gjithë kjo është bërë për të krijuar mundësi që bizneset të kenë hapësirë të mjaftueshme të zhvillojnë afarizmin e tyre dhe të gjenerojnë vende të reja të punës.
Ndër tjera, Thaçi theksoi se MTI objektivat për të ardhmen strategjike i ka orientuar në:
- Zhvillimin, përkrahjen dhe promovimin e sektorit priva NVM dhe investimeve të huaja,
- Përmirësimin e lëvizjes së lirë të mallrave apo rregullimin e tregut të brendshëm dhe
- Avancimin e politikave tregtare.
Zv/ministri Thaçi paraqiti edhe objektivat strategjike të MTI-së, që i kontribuojnë zhvillimit ekonomik në të ardhmen si :
- Zhvillimi i konkurrueshmërisë së sektorit privat përmes zhvillimit industrial dhe përmirësimit të mjedisit të të bërit biznes;
- Zhvillimi i industrisë përmes mbështetjes së sektorëve kyç për të rritur produktivitetin dhe eksportin,
- Zhvillimi i zonave ekonomike,
- Përmirësimi i qasjes në financa për biznese,
- Avancimi i politikave të turizmit,
- Nxitja dhe inkurajimi i investimeve dhe eksportit,
- Promovimi i turizmit,
- Promovimi i eksportit duke i përgatitur NMVM-të për eksport dhe identifikuar/zhvilluar tregjet potenciale,
- Zhvillimi dhe promovimi i infrastrukturës ligjore si dhe anëtarësimi në organizatat relevante evropiane dhe ndërkombëtare,
- Harmonizimi i mëtejmë i legjislacionit vendor me ato të BE-së, në fushën e infrastrukturës së cilësisë përfshirë mbrojtjen e konsumatorit dhe mbikëqyrjen e tregut,
- Ndërgjegjësimi i bizneseve dhe konsumatorëve sa i përket rolit dhe rëndësisë së infrastrukturës së cilësisë.