Nikola Radomiroviq është emëruar dje drejtor në komunën e Leposaviqit, njoftoi ministri i Administrimit të Pushtetit Lokal, Elbert Krasniqi. Por, sipas zyrtarit të PSD-së, drejtori i ri është “Nikola Radomiroviqi” që Kurti e përmendi në Kuvend, në listën e kriminelëve të veriut.
Kryeministri Albin Kurti, në një fjalim të tij në Kuvendin e Kosovës për tensionet në veri, kishte përmendur dhjetëra emra serbësh, që sipas tij, ishin prapa veprimtarive ilegale në veri. Ndër këta emra, ai kishte përmendur edhe një “Nikola Radomiroviq”.
Zyrtari i Partisë Socialdemokrate, Bardh Ahmeti, ka shkëputur pjesën ku Kurti e përmend këtë emër, duke folur për një organizatë, sipas tij, kriminale të quajtur “Brigada e Veriut”.
Ahmeti pretendon se Nikola Radomiroviq i përmendur nga Kurti në listën e kriminelëve të veriut është përsoni që u bë së fundmi drejtor në Komunën e Leposaviqit, që e udhëheq në kushte të pazakonta Lulzim Hetemi i Lëvizjes Vetëvendosje.
“Një fjalim i Albin Kurtit para dy muajsh në Kuvendin e Kosovës, fliste me emra për kriminelët në veri të Kosovës. Ama, a e dini se njëri prej tyre dje është emëruar drejtor në komunën e Leposaviqit”, ka thënë Ahmeti në një video të publikuar në rrjetet sociale.
“Ky është Albin Kurti. Kur i duhesh, nga kriminel të bën hero brenda ditës”, thotë zyrtari i PSD-së.
Fjalimin e Kurtit në Kuvend, ku përmend Nikola Radomiroviqin mund ta ndiqni KËTU.
