Të paktën 16 persona kanë humbur jetën dhe 10 të tjerë janë plagosur si pasojë e një zjarri të rënë në një ndërtesë apartamentesh në Dubai, në një lagje të njohur të Emiratit të Gjirit.
Zjarri ka rënë në mes të ditës në katin e katërt të një pallati në Al-Ras, një nga lagjet e vjetra të qytetit, ku jetojnë kryesisht punëtorë të huaj. Nga hetimet e para rezulton se zbatimi i gabuar i rregullave të sigurisë së objektit është shkaku i zjarrit, thuhet në njoftimin e Mbrojtjes Civile.
Kombësia e viktimave nuk u bë e ditur, por raportet e mediave indiane thanë se katër indianë ishin mes të vdekurve.
Dubai, është një nga shtatë Emiratet e Bashkuara Arabe dhe ka afërsisht 3.3 milionë banorë, 90% e të cilëve janë të huaj.
Qyteti ka përjetuar zjarre të mëdha në të kaluarën, duke shkaktuar dëme të konsiderueshme, por jo viktima./PrishtinaPress/