20 aksionarë të dhjetë ndërmarrjeve publike komunale në Prishtinë pritet të shkarkohen sot në një mbledhje të jashtëzakonshme të Kuvendit Komunal.
Mbledhja është thirrur nga Lëvizja Vetëvendosje dhe AAK-ja. Ajo, që pritet të jetë një nga seancat më të nxehta të Asamblesë Komunale në epokën ‘Përparim Rama’ në kryeqytet, do të zhvillohet sot në orën 14:00.
Opozita e përbërë nga Lëvizja Vetëvendosje dhe Aleanca për Ardhmërinë e Kosovës në Prishtinë, i kanë vendosur në rendin e ditës vetëm dy pikë: Shkarkimin e aksionarëve komunalë të ndërmarrje publike komunale dhe emërimin e aksionarëve të rinj.
Aktualisht, 20 aksionarë mbajnë pozita në dhjetë ndërmarrje publike komunale. Ata janë përfaqësues të koalicionit qeverisës mes LDK-së, PDK-së dhe AAK-së.
Në media ditëve të fundit është raportuar se zhvillimet e ditës së sotme rrezikojnë ta shpërbëjnë përfundimisht koalicionin, tashmë të lëkundur, mes LDK-së dhe PDK-së.
Të martën, gazeta Nacionale raportoi se sherri mes dy partive në pushtet komunal ka të bëjë me mos-mbështetjen e PDK-së për hartat zonale.
Kryetari i komunës së Prishtinës, qysh në shtatorin e vitit të kaluar kishte miratuar vendimin për formimin e një komiteti konsultativ për Hartimin e Planit Zhvillimor dhe Hartës Zonale. Ky plan – që orienton zhvillimin e kryeqytetit – do të ishte tetë-vjeçar.
Deri tash, nuk dihet saktë se cilat ishin mospajtimet specifike mes palëve, por dihet që PDK-ja nuk po pajtohet.