Zëvendësministri i Financave, Agim Krasniqi është deklaruar rreth ekzekutimit të pagesave prej 300 euro për tre muaj për ata që kanë humbur vendet e punës, pas 29 shkurtit e deri më tani.
Ai ka thënë se tërheqja e Trustit dhe neneve tjera që nuk kërkojnë miratimin e buxhetit të ri mund të zbatohen këtë vit.
Por nene të tjera sipas tij nuk mund të zbatohen pa ligjin e buxhetit të vitit 2021.
“Shumë mediume dhe qytetar këto ditë po më shkruajnë e po pyesin se kur do të filloj ekzekutimi i pagesave prej 300 eurove për ata që kanë humbur vendet e punës dhe po ashtu kur do të filloj implementimi i mbështetjes për biznese duke u mbështetur në Ligjin për Rimëkëmbje Ekonomike (LRE). Në pamundësi të përgjigjeve individuale po i`u njoftoj se disa nene të LRE mund të fillojnë të zbatohen këtë vit siç është rasti me tërheqjen e mjeteve të trustit, ose edhe nene tjera që nuk kërkojnë miratimin e Ligjit për buxhet për vitin 2021”.
Pagesat për ata që kanë humbur vendet e punës dhe mbështetja për bizneset janë të lidhura me buxhetin e ri, tha ai.
“Por disa nene të LRE nuk mund të zbatohen pa kaluar Ligji i buxhetit për vitin 2021 sepse kërkojnë që për implementimin e tyre të ketë ndarje buxhetore, të përcaktohet Institucioni që do të implementoj këto nene, të përcaktohen kriteret dhe mënyra e aplikimit të përfituesve. Kjo nënkupton që pagesat për ata që kanë humbur vendet e punës dhe mbështetja në vazhdim për biznese janë të lidhura me aprovimin e Ligjit të buxhetit për vitin 2021.
Lus qytetarët dhe bizneset që nuk kanë bërë përditësimin e të dhënave të tyre ( në ATK dhe të mirëmbajnë aktive llogaritë e tyre bankare),ta bëjnë këtë, për të mos pasur vonesa në pranimin e mjeteve në momentin e ekzekutimit të pagesave”, shkroi Krasniqi në Facebook.
