Presidenti i Ukrainës, Volodymyr Zelensky, reagoi pas ofertës së homologut të tij rus, Vladimir Putin, i cili të enjten e sfidoi Perëndimin me një duel raketash.
Zelensky foli në një konferencë për shtyp në një takim të Këshillit Evropian të enjten, raporton agjencia e lajmeve “Reuters”.
“A mendoni se ai është person normal nga mendja? Bastadët” – tha Zelensky për sugjerimin e Putinit që të testoheshin sistemet e mbrojtjes ajrore përmes hedhjes së raketës së re balistike hipersonike ruse, “Oreshnik”, drejt një shënjestre në Ukrainë.
Duke folur rreth skepticizmit të Perëndimit rreth raketës ruse “Oreshnik”, Putini sugjeroi që të dyja palët të caktonin një cak që do të mbrohej nga raketat amerikane, raporton agjencia e lajmeve “Reuters”.
“Ne jemi të gatshëm për një eksperiment të tillë” – tha kreu i Kremlinit.
Presidenti rus gjithashtu tha se raketa “Oreshnik” është armë moderne, edhe pse është e mbështetur në zhvillimet e mëparshme ruse të dizajnit.
