Grupet parlamentare opozitare kanë lëshuar seancën e sotme të Kuvendit të Kosovës, ku pati debat parlamentar për politikën e jashtme, për shkak se nga salla u largua kryediplomatja Donika Gërvalla e po ashtu në sallë nuk ishte as kryeministri Albin Kurti.
Për këtë çështje doli me një njoftim zëdhënësi i Qeverisë së Kosovës, Përparim Kryeziu, i cili tha se edhe Kurti edhe Gërvalla patën takime në agjendë me mysafirë të huaj që po qëndronin në Kosovë në vizitë zyrtare.
“Zëvendëskryeministrja Gërvalla pati takim me ministrin e qeverisë së Izraelit, Esawi Frej i cili është në vizitë zyrtare në Kosovë. Kryeministri Kurti sapo përfundoi takimin me Presidenten e Bankës Evropiane për Rindërtim dhe Zhvillim, Odile Renaud-Basso, e cila po ashtu është në vizitë zyrtare në Kosovë. Menjëherë pas takimit, deri sa ishte rrugës për në Kuvend, kryeministri Kurti u njoftua se seanca është shtyrë”, ka shkruar Kryeziu.
Zëdhënësi qeveritar po thotë se të gjithë deputetët, e ndoshta më së miri ata që në kaluarën kanë qenë pjesë e ekzekutivit, e mirëkuptojnë se takimet e nivelit të tillë konfirmohen paraprakisht dhe nuk mund të shtyhen.
Kryeziu kritikoi opozitën se lëshimi i sallës nga deputetët opozitarë u bë më shumë se “e humbën” debatin parlamentar.
“Meqë kryeministri Kurti e zëvendëskryeministrja Gërvalla munguan vetëm një orë gjatë një debati parlamentar që di të bëhet gjithëditor, shtyrja e seancës për shkak të mosprezencës së tyre më shumë duket të jetë pretekst se sa arsye. Me gjasë nuk deshtën të vazhdojnë një debat që veçse kishin filluar ta humbnin”.