Liburn Aliu në emër të GP të LVV-së, tha se me fillimin e termocentralit do të ketë një rritje të lartë të tarifave, rritje e cila, sipas Aliut, nuk do të mirëpritet nga qytetarët, raporton Ekonomia Online.
“Për periudhën për 20 vjet ata do t’i paguajnë ato para. Nëse këto shifra përkthehen në tarifa atëherë do të kemi rritje varësisht të komponimeve që kemi me i pasë. Mirëpo një rritje kaq e lartë e tarifave nuk do të mirëpritet nga konsumatorët …”.
Aliu më tutje bëri të ditur se kompania e cila do të merret me punën e termocentralit ka për detyrë që ta blejë tërë kapacitetin e termocentralit të ri edhe nëse Kosova nuk ka nevojë për to.
Sipas tij, atë energji, kompania do ta shesë më lirë sesa kostoja e prodhimit.
“Kjo kompani do të ketë për detyrë të blejë tërë kapacitetin e termocentralit të ri. Pati apo nuk pati nevojë Kosova, atë energji kjo kompani do ta shesë më lirë sesa kostoja e prodhimit. Shteti në këtë rast e merr përsipër humbjen, e Contour Global e merr përsipër fitimin. Nuk mund të ndodhë askund në botë që komplet rrezikun e një biznesi ta bartë dikush tjetër. Kjo do të jetë drejtpërdrejt në kurriz të qytetarit. Qytetari do ta paguajë komplet rrezikun e kësaj kompanie”.
Aliu ka bërë thirrje të bashkohen e të shkojnë në zgjedhje të reja, ta bëjnë rrëzimin e qeverisë, të ndalin Zajednicën dhe Contour Global-in.
Ndërkaq kryeministri Ramush Haradinaj iu drejtua deputetit Aliu duke i thënë se deputetëve shqiptarë nuk u takon ta krahasojnë Contour Global-in me Zajednicën.
“Nuk mendoj që është në rregull .. nuk na takon ne shqiptarëve, deputetëve shqiptarë me krahasu Contour Global-in me Zajednicën. Je gabim shumë. Nuk është Contour Global si Zajednica. Nuk ka të drejtë askush në këtë kuvend që të thotë se investimi në Contour Global është si Zajednica e të bëhet thirrje për me rrëzu”.
“Ju siguroj nuk e di a ka vjedh naj kush para meje, por nuk është korrupsion nuk është Axos.. unë nuk kom mujt me hy në kurrfarë marrëdhënie korruptive me ta. Nuk kom provu por nuk kom hy. Kjo është marrëdhënie serioze i kanë ligjet ma strike antikorrupsion. E me rrëzu qeverinë, kur t’i bëni numrat e rrëzoni… këtu jam”.
Liburn Aliu iu përgjigj kryeministrit duke thënë se e përbashkëta e Zajednicës dhe e Contour Global-it është se të dyja janë të këqija për Kosovën.
“Zajednica edhe Contour Globali nuk thashë që janë një. E përbashkëta e tyre është se janë të këqija të dyjat për Kosovën. Të dyjat janë të rrezikshme për Kosovën, të ardhmen e fëmijëve e rrezikojnë”.