Nën përkujdesjen e kryetarit të Komunës, Ferit Idrizi në Qendrën e Kulturës “Hasan Prishtina” në Vushtrri, është mbajtur akademi përkujtimore kushtuar 1 shtatorit, Ditës së Dëshmorëve të kësaj komune.
Përveç familjarëve, në këtë akademi kanë marrë pjesë zyrtarë të pushtetit lokal, Organizatat e dala nga Lufta, dhe personalitete tjera të jetës politike e kulturore.
Në akademinë e mbajtur, kryetari i Vushtrrisë, Ferit Idrizi i quajti dëshmorët si vula e Pavarësisë së Kosovës.
Ai tha se nderim u kanë bërë edhe dëshmorëve të vitit 1945, e cila sipas tij dëshmon rrugën e gjatë për liri.
“Jemi mbledhur sot këtu për të shënuar ditën e dëshmorëve të luftës së UÇK-së, të cilët janë vula e lirisë dhe Pavarësisë së Kosovës, të cilët e lanë këtë tokë me gjakë që ne sot të jetojmë të lirë”, tha ai raporton EO.
“Sot edhe dielli shëndriste më mirë kur bëmë homazhe te varrezat e dëshmorëve dhe gjithashtu bëmë homazje te varrezat e dëshmorëve të vitit 1945, sepse rruga e lirisë ishte e gjatë që nga shpallja e Pavarësisë së Shqipërisë. Me dekada vazhdimisht kjo tokë u la me gjakun e dëshmoreve dhe martirëve dhe sot ne festojmë lirinë e Kosovës, ditën e dëshmorëve të cilët dhanë më të shtrenjtën, jetën e tyre që ne sot të festojmë të lirë. Prandaj Vushtrria si asnjëherë më parë është krenare në përkujtim të dëshmorëve”, tha Idrizi.
