Gjykata e Prishtinës ka vendosur që të caktojë një muaj paraburgim për të dyshuarën N.M., e cila është e përfshirë në rastin e vrasjes të ndodhur më 20.08.2024 në lagjen “Kodra e Trimave” në Prishtinë. Vendimi i paraburgimit është marrë pas kërkesës së Prokurorisë Themelore në Prishtinë – Departamenti për Krime të Rënda.
Lajmin për Insajderin e ka konfirmuar Medina Gashi, nga Zyra për Informim të Mediave nga Gjykata e Prishtinës.
“Ju njoftojmë se Gjykata Themelore në Prishtinë – Departamenti për Krime të Rënda ka aprovuar kërkesën e Prokurorisë Themelore në Prishtinë-Departamenti për Krime të Rënda dhe ndaj të pandehurës N.M është caktuar masa e paraburgimit në kohëzgjatje prej një (1) muaji, e cila masë do të zgjasë nga data 20.08.2024 deri me datë 19.09.2024, për shkak të veprës penale Vrasje e rëndë nga neni 173 par.1 pika 1.3 të KPRK-së dhe veprës penale Mbajtja në pronësi, kontroll ose posedim të paautorizuar të armëve nga neni 366 par.1 të KPRK-së”.
Ngjarja dyshohet se ka ndodhur në rrugën “Ismet Krasniqi’ në Lagjen “Kodra e Trimave” në Prishtinë.
