Prokuroria Themelore në Ferizaj ka njoftuar se vrasja e policit Muhamed Lika në Kaçanik është kryer nga dy persona.
“Persona të panjohur është vrarë pjesëtari i policisë. I njëjti kur ka ndodhur rasti ka qenë duke u kthyer nga puna dhe në momentin e shkuarjes në banesë në shkallë të ndërtesës është qëlluar dhe nga plagët ka vdekur”, ka thënë kryeprokurori i Prokurorisë në Ferizaj.
“Nga provat aktin e kanë kryer dy persona e që janë larguar nga vendi i ngjarjes”, ka thënë ai.
Ai ka thënë se nga policia janë ndërmarrë shumë veprime hetimore, janë intervistuar shumë persona, dëshmitarë që kanë rastisë në vendin e ngjarjes. Gjithashtu janë ndërmarrë të gjitha veprimet për sigurimin e provave materiale.
Prokurori ka qenë në vendin e ngjarjes dhe gjitha veprimet kanë qenë të ndëmarra në koordinim me të.
“Vrasja e tij ka tronditur mbarë opinionin e gjerë marrë parasysh që i njëjti ishte duke u kthyer nga puna e në këtë shërbim ka dhënë kontribut të jashtëzakonshëm”, ka thenë kryeprokurori.
“Iu them me siguri të plotë që deri më tani nuk ka persona të arrestuar për këtë vepër penale. Ka pasë intervista e marrje në pyetje të personave, por që deri në këtë moment që po flasim nuk dimë arsyen apo motivin”, ka bërë të ditur ai.
