Gjykata Themelore në Ferizaj sot, do të mbajë seancën e shpalljes së aktgjykimit ndaj Dardan Krivaqës dhe Arbër Sejdiut, të cilët akuzohen për dhunimin dhe vrasjen e Marigona Osmanit.
Sipas njoftimit, seanca do të mbahet në ora 11:00 dhe do të jetë e hapur për publikun.
Para se të fillojë seanca gjyqësore, Kolektivi për Mendim dhe Veprim Feminist do të mbajë një protestë, për drejtësi për Marigona Osmanin dhe ‘ndëshkim maksimal për vrasësit e saj’.
Protesta do të zhvillohet nga ora 10:30, para objektit të Gjykatës së Ferizajt.
“Dhuna mizore të cilën e ushtroi Krivaqa me ndihmën e Sejdiut ndaj Marigonës deri kur e vrau dhe humbja e saj na e bën të pamundur të harrojmë. Ne nuk mund të harrojmë që Marigona do të mund të ishte gjallë sot nëse shteti do ta mbronte me kohë atë. Të indinjuar/a e me shumë dhimbje, ne mblidhemi këtë të premte dhe thërrasim në drejtësi për Marigonën”, thuhet në njoftimin e Kolektivit për Mendim dhe Veprim Feminist.
Përndryshe në seancën e fundit, Krivaqa shprehu keqardhjen për atë që ka ndodhur duke pohuar se do të donte ta kthente kohën pas.
Në anën tjetër, familja e viktimës ka kërkuar burg të përjetshëm për të akuzuarit.
Sipas aktakuzës, më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e Krivaqa ai dhe Sejdiu e kanë privuar nga jeta tani të ndjerën Marigona Osmani, me të cilën ai ishte në bashkësi jashtëmartesore.
