Eurodeputetja gjermane, Viola von Cramon, thotë se ka biseduar me kolegun e saj, Peter Beyer mbi Kosovën.
Cramon shkruan se të dy pajtohen se rruga për shtensionimin e situatës në veriun e Kosovës është propozimi trepikësh i Bashkimit Evropian, të cilin e ka pranuar së fundmi pala kosovare.
“Peter Beyer, një koleg dhe mik i vjetër nga Bundestagu dhe unë patëm një bisedë të shpejtë për Kosovën. U pajtuam që: rruga përpara për shtensionimin e veriut është zbatimi i planit tre pikësh të BE-së, përkrahja e forcave progresive në Kosovë, për të ardhmen e tyre evropiane dhe përparimi në dialog [me Serbinë]”, thuhet në postimin e von Crammon.
Përmes një marrëveshje të arritur më 1 korrik në Bratisllavë mes Zëvendëskryeministrit Besnik Bislimi dhe Emisarit të Posacëm i BE-së, Miroslav Lajcak, Kosova është zotuar të ndjekë hapat e përshkruar nga BE-ja për shtensionim të situatës.
Këtu përfshihet zvogëlimi i forcave policore nga objektet e katër komunave veriore dhe mabjtja e zgjedhjeve të jashtëzakonshme, koordinimi i veprimeve me Eulex-in dhe KFOR-in si dhe evitimi i veprimeve që çojnë në eskalim të situatës.
