Prodhuesi gjerman i veturave, Volkswagen, ka njoftuar se gjatë pesë viteve të ardhshme do të rrisë investimet e tij në fabrikat braziliane.
Bëhet e ditur se, në këto investime përfshihen 1,654,965,000 euro, dhe prodhimi i 16 modeleve të reja hibride dhe elektrike, ku vëmendja kryesisht shkon te një model 100 për qind elektrik dhe një kamion.
“Volkswagen po rikonfirmon besimin e tij në Brazil dhe po dyfishon investimet e tij”, tha shefi ekzekutiv i kompanisë braziliane, Ciro Possobom.
Kamioni i planifikuar do të prodhohet në Parana, ndërsa tre modelet e tjera shtesë dhe një motor i ri hibrid do të prodhohen në fabrikat rreth Sao Paulos, shkruan yahoonews.
Gjithashtu, kompania do të zhvillojë një sistem të avancuar të ndihmës së shoferit i cili synon të rrisë sigurinë e veturave.
Ndryshe, presidenti brazilian, Luiz Inacio Lula da Silva, pritet të vizitojë një fabrikë prodhimi të Volkswagen në Sao Paulo.
