Policia e Kosovës ka arrestuar një person në Mitrovicë nën dyshimet se ka kryer veprën penale shtytje në vetëvrasje dhe ndihma në vetëvrasje të një 19-vjeçareje me të cilën ishte i fejuar.
Më 8 shtator 2022, në orët e mbrëmjes Policia në Mitrovicë ka pranuar një informatë se në Spitalin Rajonal në Mitrovicë ishte dërguar një person i gjinisë femërore pa shenja jete.
Njësitë policore menjëherë kanë dalë në vendin e ngjarjes ndërsa sipas mjekut kujdestar personi B.Y. (19) ishte pranuar në spital pa shenja jete.
Policia ka filluar me veprimet hetimore për zbardhjen e rrethanave të rastit, ku në cilësi të dëshmitarëve janë intervistuar disa persona, ndërsa rasti me udhëzim të prokurorit ishte cilësuar si vdekje e dyshuar.
Mbrëmë, rreth orës 21:40, Njësia e Hetimeve Rajonale në Mitrovicë Jug (NJHR) në koordinim me prokurorin e shtetit, kanë arrestuar personin L.SH., (19), duke u bazuar në dyshimet se viktima kohët e fundit kishte qenë në presion të vazhdueshëm nga i dyshuari, në këtë rast i fejuari i viktimës.
Ndaj të dyshuarit është iniciuar rasti për dyshimin e kryerjes së veprës penale shtytja në vetëvrasje dhe ndihma në vetëvrasje, ndërsa me urdhër të prokurorit të dyshuarit i është caktuar masa e ndalimit policor prej 48 orësh.
Hetimet në lidhje me rastin do të vazhdojnë nga ana e hetuesve të NJHR-së në koordinim me prokurorin e shtetit.
