Veseli: Shteti ynë do të ecë përpara bashkë me Amerikën dhe BE-në

Kryetari i Kuvendi të Kosovës, Kadri Veseli thotë se Dita e sotme dëshmon se parlamentarizmi në Kosovë është i vetmi fitues i një debati të lodhshëm, me dhe pa argumente të atij apo këtij lloji
Sipas Veselit, përkufizimi i kufijve të shtetit të Kosovës, është një nevojë dhe realizim historik i një procesi të shtetbërjes, të konfirmuar me rezistencën e popullit të Kosovës, shkruan lajmi.net.
“Unë, si Kryetar i kësaj legjislature, me detyrë kaq komplekse, dua të falënderoj së pari deputetët e Partisë Demokratike dhe strukturat e sajë për qëndrimin u ik si dhe të gjithë akterët parlamentarë, institucional e shtetëror, me theks të veçantë Policinë e Kosovës”, thuhet në deklaratën e Veselit.
Veseli thotë se “I siguroj qytetarët e Republikës së Kosovës se shteti jonë, do të ecë përpara, në partneritet të përhershëm me Shtetet e Bashkuara të Amerikës dhe Bashkimin Evropian”.
Ja deklarata e plotë e kryetarit të Kuvendit të Kosovës, Kadri Veseli
“Dita e sotme dëshmon se parlamentarizmi në Kosovë është i vetmi fitues i një debati të lodhshëm, me dhe pa argumente të atij apo këtij lloji
Përkufizimi i kufijve të shtetit të Kosovës, është një nevojë dhe realizim historik i një procesi të shtetbërjes, të konfirmuar me rezistencën e popullit të Kosovës, proceset negociatore (Rambulliet, Vjenë, Bruksel), dhe obligimeve ndaj neve dhe tjerëve, fqinjve, partnerëve ndërkombëtar dhe vetë Kosovës si faktor që hyn në familjen e kombeve dhe shteteve duke marrë obligime dhe privilegje nga ky proces historik.
Është një privilegj dhe obligim që e jetojmë këtë kohë dhe sillemi konform kësaj situate historike.
Legjitime është që në një betejë parlamentare, të mbahen interesat partiake, por ajo që vlenë në një gjyq historik janë interesat nacionale.
Unë, si Kryetar i kësaj legjislature, me detyrë kaq komplekse, dua të falënderoj së pari deputetët e Partisë Demokratike dhe strukturat e sajë për qëndrimin u ik si dhe të gjithë akterët parlamentarë, institucional e shtetëror, me theks të veçantë Policinë e Kosovës.
Dua që të mos jemi shpirtngushtë, të mos mbizotërojë zhurma mbi argumentin. Lotsjellësi mbi debatin, granata mbi bisedën. Dua të gjithë të kujtohemi që shteti që po e ndërtojmë është mbi të gjitha kapriciet, shpirtngushtësitë, interesat, kalkulimet dhe agjendat personale, grupore e të interesit.
I siguroj qytetarët e Republikës së Kosovës se shteti jonë, do të ecë përpara, në partneritet të përhershëm me Shtetet e Bashkuara të Amerikës dhe Bashkimin Evropian.
Do të futemi shumë shpejt nga agjenda e krizave dhe konfliktualitetit në agjendën e konsensusit të përbashkët nacional dhe zgjidhjeve të çështjeve jetësore për qytetarët e Republikës së Kosovës.
Faliminderit të gjithë qytetarëve të Republikës së Kosovës. Vetëm të bashkuar, mund të ecim përpara në rrugën e zhvillimit dhe integrimit”, thuhet aty. /PrishtinaPress.eu