Kryetari i Kuvendit të Kosovës, njëherësh lider i PDK-së Kadri Veseli vlerëson se politikanët në Kosovë po humbin kohë duke u marrë me vetveten, duke i lënë anash shqetësimet dhe kërkesat e qytetarëve.
Ai tha se ka zgjedhur një model të ri përmes turit të dëgjimeve dhe bashkëbisedimit me qytetarët për të marrë prej tyre idetë dhe sugjerimet për të ardhmen e Kosovës.
Këto komente Veseli i bëri gjatë një interviste në emisionin Info Magazine në Klan Kosova.
“Unë po merrem me qytetarët, po i dëgjoj idetë dhe sugjerimet e tyre për të ardhmen e vendit tonë. Ne nuk mund të rrimë e të dëgjojmë vetëm akuza e kundër akuza e mos të merremi me jetën e qytetarëve tanë. Nga turi im i dëgjimit unë po dëgjoj ide dhe sugjerime shumë të mira të cilat nuk do ti lë të heshtura por do ti marr përsipër në rrugën time politike”, ka thënë ndër të tjera Veseli.
