Vasfije Krasniqi Goodman, ishte një nga gratë e mbijetuara nga dhuna seksuale gjatë luftës në Kosovë. Ajo ishte vetëm 16-vjeçare, kur përjetoi dhunën nga forcat serbe.
Por këtë dhimbje, ajo e ktheu në forcë. Ajo doli dhe foli për këtë temë publikisht. E kjo gjë, u bë motiv dhe mbështetje edhe për shumë gra të tjera që përjetuan dhunë seksuale.
Ani pse shumë shpesh këto gra nuk përkrahën nga familjarët, familja Krasniqi veproi ndryshe.
“Krimi si i tillë, cilësohet si një prej krimeve më të rënda, se çdo veprim pastaj bëhet në heshtje. Është pak e rëndë me u ballafaqua, sepse është vërtetu dhe konfirmohet se krimi është bë qëllimisht. Kur Buqja u dhunua dhunuesit kanë thëne që ne kemi me t’i lanë gjallë, që ti dhe familja juve të na kujtoni dhe brezat që vijnë. Ne i kujtojmë ata për shkak të mënyrës barbare që kanë pas. Mënyrën qysh ne e kemi përkrahë Buqen jemi gatshëm me përcjelle tek te tjerët’’
E ajo që e mundon Krasniqin që sa vite, është fakti se në kohën kur motra e tyre u keqtrajtua, familja nuk kishte arritur t’i dilte në ndihmë.
‘’Ne i kemi kërkuar falje qe s’kemi mundur ta mbrojmë, ne nuk kemi pranu me u dërmu e me vuajt edhe me heshtë. Ne si familje e kemi trajtu gjithmonë faktin se ajo çfarë Buqes i ka ndodhë s’ka të bëjë me moralin ,as me nderin”, ka thënë Krasniqi. /T7/
Ndërkaq, Krasniqi pati një kërkesë për gjithë familjarët të cilët kanë anëtarë që u bënë pre e dhunës seksuale gjatë kohës së luftës.
Ai kërkoi që këto familje të paraqiten në shoqatë, në mënyre që të marrin trajtimin e duhur.