Bajram Popaj, ish ushtar i UÇK-së ka ndërruar jetë.
Këtë e bëri të ditur kryetari i Rahovecit, Smajl Latifi i cili thotë se Popaj ishte një nga luftëtarët e parë të luftës për liri.
Ky është postimi i tij i plotë:
BAJRAM POPAJ E KREU ME NDER MISIONIN E ÇLIRIMIT TË ATDHEUT
Lufta jonë për liri nuk do të kishte peshën që pati pa kontributin e luftëtarit të orëve të para Bajram Popaj. Ai gjatë gjithë jetës ishte në anën e duhur të historisë dhe ashtu mbeti deri në fund. Trishtimi kaplon shpirtin dhe fjalët vështirë të renditen për një shok e luftëtar të denjë lirie.
Pesha e dhembjes rëndon në shpirtin tonë, sepse Bajrami ishte guri që shkëlqente në mozaikun e shoqërisë tonë. E donte jetën dhe për të luftoi fort, ngase dëshironte që ende të kontribuonte për vendin e tij, që aq shumë e deshi dhe rrezikoi jetën e gjithçka që pati.
Përkushtimi i Bajramit për lirinë dhe ndërtimin e ushtrisë së Kosovës, për rindërtimin dhe ndërtimin e zhvillimin e vendit tonë, mbeten shëmbëlltyrë. Ishte nga ata veprimtarë që imponohen me fjalën e urtë, me maturinë në komunikim, me mirëkuptimin e tolerancën, me dashurinë e pakushtëzuar për mikun dhe me cilësitë më të mira që e karakterizojnë një njeri me vlera njerëzore e atdhetare.
Bajrami e meriton nderimin dhe respektin e shoqërisë, ai meriton mirënjohjen tonë për ato që ka bërë për këtë vend, prandaj i përkulemi jetës dhe veprës së një veprimtari e atdhetari shembullor.
Ngushëllime të sinqerta familjes së nderuar Popaj, shokëve, bashkëluftëtarëve dhe gjithë bashkëqytetarëve!
Pusho në paqen e përjetshme, shoku e bashkëluftëtari ynë. Lavdi e nderim jetës e veprës së luftëtarit dhe njërit prej drejtuesve ushtarak të paepur në luftë e në paqe, Bajram Popaj!
