Të dielën në Kosovë zyrtarisht janë regjistruar nëntë rastet e para të infektimit me variantin “Omicron” të coronavirusit.
Katër nga këta të infektuar janë nga Mitrovica.
Drejtoresha e Spitalit të Mitrovicës, Luljeta Zhubi ka thënë për RTV Dukagjinin përmes telefonit se të gjithë këta persona po trajtohen në shtëpi.
Sipas Zhubit gjendja e tyre është stabile.
Ndërkohë siç përcjell Telegrafi, për qytetarët e Mitrovicës masat janë duke e zbatuar jo kënaqshëm, derisa flasin edhe për variantin Omicron.
“Ky variant paraqet rrezikshëmri pavarësisht se në Kosovë tek tash ka filluar, por ne duhet t’u përmbahemi rregullave. Ajo që është më me rëndësi është të vaksinohen”, shprehet qytetari Zahir Musa.
Një tjetër qytetar fajin e lë te shteti që ka lejuar të futen në Kosovë persona me variantin e tillë të virusit.
“Varianti është shumë i rrezikshëm. Nuk e di pse ky shtet i ka lejuar ata njerëz të vijnë në Kosovë e të rrezikojnë gjithë qytetarët.
Nënkryetari i Mitrovicës Arian Tahiri thotë se gjatë ditëve në vijim do të mblidhet shtabi emergjent për të diskutuar në lidhje me situatën epidemike në komunë.
