Bashkimi Evropian do të nisë bisedimet e pranimit me Ukrainën dhe Moldavinë të martën, duke nxitur mirënjohje në Kiev dhe Kishinau.
“I jam mirënjohës të gjithëve në ekipin tonë që punoi shumë për ta bërë realitet këtë hap historik”, tha Presidenti ukrainas Volodymyr Zelensky. “Miliona ukrainas, dhe në të vërtetë breza të popullit tonë, po realizojnë ëndrrën e tyre evropiane. Ukraina po kthehet në Evropë, ku përket prej shekujsh, si një anëtare e plotë e komunitetit evropian”, raporton “Politico”.
Presidentja e Moldavisë Maia Sandu tha se “të bëhesh anëtare e BE-së është rruga jonë drejt paqes, prosperitetit dhe një jete më të mirë për të gjithë qytetarët”.
Bisedimet e pranimit do të nisin në Luksemburg të martën pasdite nëpërmjet dy konferencave ndërqeveritare që BE do të mbajë veçmas me Ukrainën dhe Moldavinë.
Hapja e negociatave është hapi tjetër në atë që ka të ngjarë të jetë një rrugëtim i vështirë dhe shumëvjeçar drejt anëtarësimit. Ukraina dhe Moldavia fqinje aplikuan për t’u anëtarësuar në BE në vitin 2022, pasi presidenti rus Vladimir Putin filloi pushtimin e tij në shkallë të plotë të Ukrainës.
Vendimi i bllokut për të filluar bisedimet vjen dy javë pasi BE njoftoi se të dy vendet kanë përmbushur kërkesat e nevojshme për të filluar negociatat.
Diplomatët e BE-së kanë bërë presion për të filluar bisedimet në qershor përpara se Hungaria të marrë presidencën e radhës të Këshillit të BE-së më 1 korrik.
