Krerët e dy partive më të mëdha opozitare në vend, Memli Krasniqi e Lumir Abdixhiku, e kanë refuzuar ftesën e Kryeministrit Albin Kurti për takim. I vetmi që do të shkojë në takimin e thirrur nga Kurti për sot, është kreu i AAK’së, Ramush Haradinaj.
Kryeministri i Kosovës, Albin Kurti, u ka dërguar dje ftesë për një takim krerëve të partive opozitare në vend. Takimi është planifikuar të mbahet sot, në orën 12:00.
Por, jo të gjithë sot do t’i shkojnë në takim.
Kryetari i PdlDK’së, Memli Krasniqi ka deklaruar se s’do t’i shkojnë Kurtit në takim për çështje teknike, por vetëm kur të flitet për marrëveshjen finale me Serbinë.
“Vetëm pasi kërkuam sqarime, kuptuam me një fjali përmes emailit se bëhej fjalë për një temë shumë serioze – siç është Dialogu Kosovë-Serbi. Pa asnjë detaj konkret e pa specifikuar asgjë. Po jua rikujtoj që s’keni asnjë arsye që të na ftoni në takime për çështje teknike. Ndërsa, kur të ketë diskutim konkret për marrëveshjen finale, ne do të jemi aty. Ka ditë që në opinion flitet për një dokument që ju e keni në tavolinë rreth marrëveshjes për normalizimin e marrëdhënieve mes dy vendeve, të ofruar nga partnerët ndërkombëtar të Kosovës”, tha Krasniqi nëpërmjet një video selfie të publikuar në faqen e tij në Facebook.
Krasniqi ka thënë se për tema të tilla, vendi i diskutimit duhet të jetë salla e Kuvendit të Kosovës, e jo zyret.
Ai i ka bërë thirrje që këto diskutime që i ka planifikuar Kurti për të premten, t’i bart në Kuvend.
Ftesën e Kurtit e ka refuzuar edhe Kreu i Lidhjes Demokratike të Kosovës, Lumir Abdixhiku.
Zëdhënësja e LDK’së, Sibel Halimi, ka deklaruar se për çështjen e dialogut, që u përfol se do të diskutohej të premten në takim, Kurti duhet të raportojë vetëm në Kuvend.
“Për temën e dialogut, Kryeministri i Kosovës duhet të raportojë vetëm në Kuvendin e Kosovës. Aty LDK do t’i ritheksojë dhe qëndrimet e saja. Ky ka qenë dhe dakordimi i liderëve nga takimi paraprak”, tha ajo.
Halimi deklaroi se LDK kërkon që marrëveshja finale me Serbinë medoemos të fokusohet në njohje reciproke.
“Për LDK-në, marrëveshja finale me Serbinë duhet të bëhet vetëm rreth njohjes reciproke. Në këtë marrëveshje të njohjes, rendi kushtetues, integriteti territorial e sovraniteti i vendit janë të panegociueshme.”, ka deklaruar Halimi.
I vetmi që e ka pranuar ftesën për takim të të parit të ekzekutivit, është kreu i Aleancës për Ardhmërinë e Kosovës, Ramush Haradinaj.
Këtë e ka konfirmuar zëdhënësi i AAK’së, Lulëzim Blaka.
Kryetari Haradinaj merr pjesë të premtën në takim”, ka deklaruar shkurt zëdhënësi Blaka.
Ftesa e Kurtit për opozitarët erdhi menjëherë pas takimit të tij me të dërguarin e Posaçëm të Shteteve të Bashkuara të Amerikës për Ballkanin Perëndimor, Gabriel Escobar.
Escobar pas takimit me Kurtin, rispërsëriti se SHBA-të mbështesin Kosovën në të gjitha aspiratat e saj euroatlantike.
“Është një partneritet i palëkundshëm ndërmjet Kosovës dhe SHBA-ve. Diskutuam edhe për çështjet e marrëdhënieve me Serbinë dhe implikimet rajonale nga dialogu.
Diskutuam për procesin dialogut dhe se sa e rëndësishme është të rreshtoheni me vlerat evropiane në këtë kohë shumë të rëndësishme krize në kontinentin evropian. SHBA-të e mbështesin Kosovën në të gjitha aspiratat e tyre euroatlantike dhe do të shohim mundësitë për të pasur partneritet me Kosovën për ta mundësuar një gjë të tillë”, tha Escobar.
Pas takimit, Escobar ka dhënë edhe një intervistë për Kanal 10, ku tha se u ka kërkuar institucioneve të Kosovës që të shtyjnë për 10 muaj afatin për targat, por se s’mori zotim për këtë as nga Presidentja Vjosa Osmani e as Kryeministri Albin Kurti.
Escobar ka deklaruar se më e rëndësishme për Kosovën është anëtarësimi në Bashkimin Evropian dhe NATO, si dhe njohja nga pesë shtetet mosnjohëse të BE’së.
Për njohjen nga Serbia, ka thënë se do të ndodhë në një fazë më vonë.
“Mendoj, se njohja do të ndodhë, do të duhet të ndodhë dikur në një fazë më vonë. Çështja është për kohën se kur do të ndodhë kjo njohje. Por, ajo që është e rëndësishme për Kosovën është që të nisni një rrugë më të qëndrueshme drejt integrimit në strukturat euro-atlantike, duke përfshirë njohjen nga pesë shtetet mosnjohëse të BE-së. Kjo është më e rëndësishmja që mund të nxirrni se çkado tjetër në proces”, ka deklaruar Escobar.
Ai foli edhe për propozimin franko-gjerman, për të cilin tha se e mbështesin plotësisht Shtetet e Bashkuara të Amerikës.
Emisari i ShBA’së zbuloi edhe se në takimin me Osmanin kanë folur për themelimin e Asociacionit të komunave me shumicë serbe, saktësisht për disa modele evropiane se si mund të bëhet. Tha se themelimi i Asociacionit është element i rëndësishëm i marrëveshjes finale.
Për afatet kohore për arritjen e një marrëveshje mes Kosovës e Serbisë, Escobar tha se ka dëgjuar nga kolegët evropianë se kjo është çështje javësh e jo vitesh.
E për elementet e një marrëveshje finale mes Kosovës dhe Serbisë, Escobar tha se varen nga vetë palët, por se ShBA’të do të sigurohen që s’do të prekin pavarësinë, sovranitetin dhe funksionalitetin e pavarësisë së Kosovës.
