Ministri i Shëndetësisë, Armend Zemaj, ka reaguar ndaj tubimit të Lëvizjes Vetëvendosje.
Zemaj ka thënë se ngjarje të tilla në numra të mëdhenj mund të shndërrohen në super-ngjarje të përhapjes së COVID-19.
Ai thotë se injorimi i këshillave të mjekëve dhe ekspertëve shëndetësore është akt i rrezikshëm.
Zemaj ka cituar edhe ambasadën amerikane në Kosovë që paralajmëroi se “Tubimet në numra të mëdhenj mund të shndërrohen në super-ngjarje të përhapjes së Covid-19″.
“Dashtë Zoti të mos përsëritet rasti i 19 shkurtit që ndodhi në stadiumin San Siro në Milano të Italisë, ku u infektuan me koronavirus 40.000 tifozët, si rezultat i kontakteve në mes tyre, të cilët e kishin ndjekur ndeshjen e futbollit Atalanta – Valencia”.
Ky është postimi i tij:
Të nderuar qytetarë, të vazhdojmë të jemi të kujdesshëm!
Të mendohet vetja mbi Zotin, e të paushallizohet mundësia e infektimit me virusin Covid-19, pandemi kjo më e madhe që ka goditur ndonjëherë botën, sikurse të injorohen këshillat e mjekëve dhe ekspertëve të shëndetësisë që çdo ditë porosisin që ne të mbajmë distancën sociale, është e njëjtë sikurse një amator i papërvojë t’ia mësyjë e të ec me majat gishtave të këmbeve në tel. Kjo, sa do të ishte e mundur aq edhe e rrezikshme për të arritur në finish.
Pardje, miqtë tanë të ambasadës së SHBA-ve dhanë paralajmërimin se: “Tubimet në numra të mëdhenj mund të shndërrohen në super-ngjarje të përhapjes së COVID-19”.
Njëjtë e thonë çdo ditë dhe mjekët tanë dhe Instituti Kombëtar i Shëndetësisë Publike të Kosovës/ IKSHPK.
Virusi transmetohet nga njëri tek tjetri. Nëse organizohen tubime të qytetarëve, do të ishte pretekst të shkaktohej një dergje e madhe nga virusi.
Dashtë Zoti të mos përsëritet rasti i 19 shkurtit që ndodhi në stadiumin San Siro në Milano të Italisë, ku u infektuan me koronavirus 40.000 tifozët, si rezultat i kontakteve në mes tyre, të cilët e kishin ndjekur ndeshjen e futbollit Atalanta – Valencia.
