Nëna e Alexei Navalny nuk ka qenë në gjendje të marrë trupin e tij pas vdekjes së tij në një burg në Arktik, thotë një ndihmëse e ngushtë e liderit rus opozitar, për vdekjen e të cilit u njoftua të premten.
Kira Yarmysh tha se nënës së tij, Lyudmila, iu tha se trupi i tij do të dorëzohej vetëm pasi të kishte përfunduar një ekzaminim pas vdekjes, shkruan BBC.
Ekipi i Navalny beson se aktivisti kundër korrupsionit u vra me urdhër të presidentit Vladimir Putin.
Një grup i të drejtave të njeriut tha se 300 rusë ishin arrestuar për nderimin ndaj tij.
Qeveritë perëndimore thonë se fajin e kanë autoritetet ruse për vdekjen e papritur të 47-vjeçarit, ndërsa ministrat e jashtëm nga grupi i vendeve të pasura G7 i bënë thirrje Rusisë që të “sqarojë urgjentisht” rrethanat e rastit.
Putin nuk ka komentuar publikisht që kur shërbimi rus i burgjeve njoftoi të premten se Navalny ishte sëmurë dhe vdiq në burgun e largët IK-3 në Rrethin Arktik.
Menjëherë pas kësaj, Kremlini tha se ishte në dijeni dhe se presidenti ishte informuar.
Ministria e Jashtme e Rusisë tha se hodhi poshtë vlerësimet si “të njëanshme dhe joreale” mbi shkakun e vdekjes së tij, të bëra gjatë një takimi me zyrtarët britanikë të shtunën.
Navalny ishte një nga fytyrat më të spikatura të opozitës ruse ndaj regjimit të Putinit dhe po vuante një dënim prej tre dekadash për akuza të motivuara politikisht në koloninë penale “Ujku Polar” në Kharp, rreth 1900 km në veri të Moskës.
Nënës së tij, Lyudmila Navalnaya, thuhet se iu tha nga shërbimi i burgut se ai vdiq të premten pasi u rrëzua dhe ra pa ndjenja gjatë një shëtitjeje, tha ekipi i tij.
Ajo vizitoi burgun të shtunën dhe iu dha një njoftim zyrtar që thoshte se ora e vdekjes ishte 14:17 me orën lokale, tha zonja Yarmysh.
Një tjetër aleat i Navalny, Ivan Zhdanov, tha se nënës së aktivistit iu tha se ai vdiq nga “sindroma e vdekjes së papritur” – një term i përgjithshëm dhe i paqartë për një gjendje që shkakton vdekje të papritur nga arresti kardiak pa ndonjë shkak të dukshëm.
Ekipi i tij tha se zonjës Navalny iu tha se trupi i tij ishte dërguar në qytetin Salekhard, pranë kompleksit të burgut, por kur ajo mbërriti, morgu ishte i mbyllur.
Zyrtarët e burgut thuhet se i thanë asaj se një ekzaminim fillestar pas vdekjes nuk ishte përfundimtar dhe do të duhej të kryhej një i dytë.
Aleatët e Navalny pretendojnë se trupi i tij po mbahet qëllimisht nga autoritetet ruse në mënyrë që ata të “mbulojnë gjurmët” dhe bëjnë thirrje që trupi t’i kthehet familjes së tij “menjëherë”.