Presidenti Donald Trump tha se telefonata e tij sot me Presidentin ukrainas Volodymyr Zelensky ishte “shumë e mirë” dhe zgjati rreth një orë, me shumicën e bisedës të përqendruar te diskutimi i tij me Presidentin rus Vladimir Putin të martën, shkruan CNN.
“Sapo përfundova një telefonatë shumë të mirë me Presidentin Zelensky të Ukrainës. Ajo zgjati afërsisht një orë. Pjesa më e madhe e diskutimit u bazua në telefonatën e bërë dje me Presidentin Putin, me qëllim që të harmonizohen kërkesat dhe nevojat e Rusisë dhe Ukrainës,” shkroi ai në një postim në rrjetet sociale.
“Ne jemi në rrugën e duhur dhe do t’i kërkoj Sekretarit të Shtetit, Marco Rubio, dhe Këshilltarit për Sigurinë Kombëtare, Michael Waltz, të japin një përshkrim të saktë të pikave të diskutuara. Ky deklarim do të publikohet së shpejti,” shtoi ai.
Telefonata është biseda e parë midis Trump dhe Zelenskyt që nga përplasja e tyre në Zyrën Ovale 19 ditë më parë.
