Ish-presidenti Donald Trump tha të dielën se pret që fituesi i zgjedhjeve presidenciale të shpallet në ditën e zgjedhjeve, sipas ABC News.
Trump, i cili ka bërë pretendime në lidhje me mashtrimin dhe nuk i ka pranuar zgjedhjet e vitit 2020, u pyet nëse mendonte se kishte ndonjë mënyrë që mund të humbiste.
“…Unë mendoj se ju mund të humbni, mund të humbni. Dua të them, kjo ndodh, apo jo? Por unë mendoj se kam një epërsi mjaft të konsiderueshme… Gjëra të këqija mund të ndodhin. E dini, gjërat ndodhin, por do të jetë interesante”.
Ndërsa i pyetur nga ABC News se kur planifikon t’i drejtohet vendit në ditën e zgjedhjeve, ai tha: “Unë do të jem atje në kohën e duhur”.
Kujtojmë se në vitin 2020, Trump para kohe e shpalli veten fitues në mëngjesin e hershëm të ditës pas zgjedhjeve, pavarësisht miliona fletëvotimeve të mbetura për t’u numëruar në shtetet kyçe.
Më pas ai pretendoi se “i fitoi” zgjedhjet, pavarësisht miliona votave që ende nuk ishin numëruar.