Sonte palestra “Minatori” do të jetë arenë e ndeshjes së parë të çerekfinales së dytë mes Trepçës e Bashkimit.
Të dy ekipet do të luftojnë për një vend në “Play Off-in” e basketbollit kosovar.
Në katër duelet mes tyre direkte në sezonin e rregullt, më e mirë ishte Trepça që mori tri fitore, karshi një për Bashkimin.
Sezonin e rregullt, mitrovicasit e mbyllën në pozitën e katërt, derisa prizrenasit të pestit.
Po ashtu, xehetarët morën 17 fitore e 11 humbje, derisa e kundërta ishte për portokallinjtë.
Skuadra e cila i arrin dy fitore kanë në gjysmëfinale, atje i pret Sigal Prishtina, që e mbylli edicionin si e para.
Kjo përballje nis nga ora 20:30, derisa ajo e dyta zhvillohet në vikend.
Mbrëmë, Golden Eagle Ylli arriti fitore të pritshme ndaj Vëllaznimit me rezultatin 111:86.
Suharekasit ishin më të mirë që nga fillimi e deri në fund, diferenca u bë në çerekun e dytë, të cilin kampionët e fituan me plus 13.
Plot shtatë basketbollistë realizuan pikë dyshifrore për Yllin, derisa më i dalluari ishte Davis me 26 pikë. Për gjakovarët nuk mjaftuan 28 pikët e Atik Koshit për fitore. Skuadra mes Yllit e Vëllaznimit që kalon në gjysmëfinale do të përballet me Pejën, e pozitës së dytë në stinorin e rregullt.
