Ka humbur jetën një i ri nga Kosova, si pasojë e goditjes nga treni në qytetin Nauchatel të Zvicrës.
Lajmin e ka bërë të ditur kryetari i AKR-së, Behgjet Pacolli, përmes një shkrimi në Facebook.
“Mbrëmë humbi jetën edhe një i ri nga Kosova. Ky është Adrian Ramadani i cili u godit nga treni për vdekje në qytetin Nauchatel. Ngushëllimet e mia më të sinqerta familjes dhe farefisit. Ndajmë dhimbjen së bashku”, ka shkruar Pacolli.
“Pak pas orës 8:00 të mëngjesit, ndërsa tetë të rinj po prisnin që treni të kthehej në Neuchâtel në Zvicër, një 15-vjeçar u largua nga grupi dhe u drejtua për në shina. Ai nuk e vuri re hyrjen e një treni të Transportit Publik Freiburg në stacion dhe u godit nga pjesa e përparme e automjetit”, tha policia kantonale e Fribourg në një deklaratë, shkruan 20 min.ch.
Adrian Ramadani, 15-vjeçari i cili humbi jetën tragjikisht në Nauchatel të Zvicrës ishte me prejardhje nga Panorci i Malishevës.
Nënkryetari i Komunës së Malishevës Hajdin Berisha, ngushëlloi familjen Ramadani nga Panorci me rastin e vdekjes tragjike të djalit të tyre në Zvicër.
“Sot, në mesditë na tronditi lajmi i rëndë për ndarjen nga jeta e të riut Adrian Ramadani nga Panorc. Ai, humbi jetën tragjikisht mbrëmë në një qytet në Zvicër. Ndarja nga jeta e tij, na tronditi pa masë. Solidarizohemi dhe ndajmë dhimbjen me familjarët e Adrianit, dhe do të ju qëndrojmë afër në përballimin e kësaj dhimbje të madhe.Në emër të Komunës së Malishevës, ju shprehim ngushëllime familjes Ramadani dhe të afërmëve të tyre”, thuhet në telegramin e ngushëllimit të nënkryetarit të Komunës së Malishevës.
