Tre vëllezër nga fshati Runik i Skenderajt kanë përfunduar mbrëmë në Polici, pasi u përfshinë në një përleshje me komshiun e tyre.
Një problem i mëhershëm u rikthye sërish dhe ata u futën në telashe, duke tentuar t’i qërojnë hesapet.
Burimet nga Prokuroria kanë bërë me dije se tre të dyshuarit e kanë sulmuar fizikisht fqinjin e tyre, të cilit i kanë shkaktuar lëndime trupore, duke e goditur me grushte.
Problemi që ata kanë pasur mes vete lidhet me një rast të vjedhjes së një veture, që i kushtoi viktimës me sulm fizik.
Përballë kësaj situate, ai fillimisht mori trajtim mjekësor në spital, e më pas ia mësyu Policisë, ku ka dhënë deklaratën e tij lidhur me atë që kishte ndodhur.
Si rezultat i denoncimit, të dyshuarit janë shoqëruar në stacion policor, ku janë intervistuar lidhur me veprën me të cilën ngarkohen.
Ndaj tyre, Prokurori i Shtetit ka urdhëruar inicimin e rastit dhe nisjen e hetimeve për zbardhjen e rrethanave të ngjarjes./PrishtinaPress/
