Në Kosovë janë 3.000 deri në 5.000 përdorues problematikë të drogës që janë të varur dhe që e përdorin rregullisht dhe kanë problem me ligjin, kanë bërë të ditur Policia dhe një terapist i njohur kosovar i përdoruesve të drogave.
Më shqetësuese, sipas tyre, është se po rritet vazhdimisht numri i përdoruesve të drogave nga moshat e reja, shkruan sot Koha Ditore.
Drejtuesi i Qendrës Mediko-Psikoterapike “Labirinth”, Safet Blakaj, ka thënë se droga e tipit heroinë ka shënuar rënie të dukshme, posaçërisht tek të rinjtë derisa ngritje ka pasur tek drogat e tipit kokainë si dhe amfetamin ose speed.
Zëdhënësi i Policisë së Kosovës, Daut Hoxha, ka thënë se për luftimin e dukurive negative në shoqëri, përveç veprimeve aktive policore është e domosdoshme ndërmarrja e masave proaktive.