Para agimit, pak para se të fillonin shpërthimet në qytetet anembanë Ukrainës, televizioni shtetëror rus transmetoi papritur një fjalim të presidentit rus Vladimir Putin, raporton CNN, përcjell Gazeta Express.
Dy “republikat popullore” të vetëshpallura të Donetskut dhe Luhanskut, në rajonin e shkëputur ukrainas të Donbasit, të cilat ai e kishte njohur zyrtarisht si të pavarura para më pak se dy ditësh, “i janë drejtuar Rusisë me një kërkesë për ndihmë”, tha ai. Për t’iu përgjigjur kësaj thirrjeje ai po e fillonte një “operacion special ushtarak”. Qëllimi i tij: ta “çmilitarizojë” dhe “denazifikojë” Ukrainën.
Brenda pak minutash, raketat ruse filluan t’i godasin objektivat e tyre në Ukrainë. “Veprimet tona janë vetëmbrojtje kundër kërcënimeve”, u tha ai bashkëkombësve të tij rusë, duke pretenduar se Moska nuk kishte plane për ta pushtuar Ukrainën.
Putini e përshkroi “operacionin special ushtarak” në terma të kufizuar, për t’i mbrojtur njerëzit që jetonin në Donbas, të cilët, sipas tij, i ishin nënshtruar “gjenocidit”, një akuzë që Ukraina e ka mohuar ashpër.
Siç ka bërë shumë herë më parë, Putini pretendoi se Rusia nuk kishte zgjidhje tjetër veçse “të mbrohej”. Me një ton të ashpër në zërin e tij, si dukej se e kërcënonte SHBA-në, Evropën dhe NATO-n.
“Kushdo që përpiqet të ndërhyjë tek ne dhe aq më tepër të krijojë kërcënime për vendin tonë, për popullin tonë, duhet ta dijë se përgjigja e Rusisë do të jetë e menjëhershme dhe do t’ju çojë në pasoja të tilla që nuk i keni përjetuar kurrë në historinë tuaj”, tha Putini.
“Ne jemi të gatshëm për çdo zhvillim të ngjarjeve. Janë marrë të gjitha vendimet e nevojshme në këtë drejtim”, theksoi presidenti rus.
Putini për vite me radhë e kishte kritikuar Perëndimin se po i injoron ankesat e tij për zgjerimin e NATO-s përreth kufijve të Rusisë, që kulmoi me një tërbim.
Dekreti i tij për t’i njohur si të pavarura dy rajonet separatiste në lindje të Ukrainës, u dha leje forcave ruse që të futen andej, ndërsa në orët e para të mëngjesit të sotëm pati shpërthime që rezultuan me të vrarët e parë të një lufte, pasojat e së cilës duken të paparashikueshme.
