Tetë diplomatë të lartë ndërkombëtarë, pritet të japin dëshminë e tyre në Dhomat e Specializuara të Hagës pro ish-presidentit të Kosovës, Hashim Thaçi, i cili po akuzohet për krime lufte dhe krime kundër njerëzimit.
Avokati Gregory Keohe ka dorëzuar parashtresën me emra dëshmitarësh të cilët, sipas tij, kanë pasur kontakte me Thaçin.
Në parashtresën e avokatit Keohe, si dëshmitarë që do të dëshmojnë në këtë gjykim janë ish-komandanti i forcave të NATO-s për Evropë, Wesley Clark, ish-shefi i UNMIK-ut, Bernard Kouchner dhe ish-shefi i misionit të OSBE-së në Kosovë, William Walker.
Pos këtyre si dëshmitarë përmenden edhe Steve Bennett, ish-drejtor i Misionit të OSBE-së për Edukim dhe Zhvillim Policor, Jock Covey, zëvendësdrejtor i UNMIK-ut dhe ish-këshilltari politik i Clarkut, Michael Durkee.
Në vijim avokati ka sqaruar se këta dëshmitarë do të tregojnë ndërveprimet e tyre me Thaçin, duke përfshirë sjelljen, qëndrimet që janë relevante për akuzat kundër tij.
Keohe ka thënë se këta dëshmitarë janë në moshë të shtyrë andaj ka kërkuar nga gjykatësi që të marrë masa për marrjen në pyetje qysh tani.
“Këta 9 dëshmitarë janë në moshë të shtyrë nga 77 deri në 88-vjeç dhe me shkallë të ndryshme shëndetësore. Rrjedhimisht, ekziston një rrezik që provat e tyre mund të mos jenë të disponueshme në gjykim. Prandaj, në bazë të Rregullës 99, ekziston nevoja për një mundësi unike hetimore siç përcaktohet më poshtë për secilin prej këtyre 9 dëshmitarëve, për të siguruar ruajtjen e provave të tyre përpara se të fillojë gjykimi” -thuhet në parashtresën e avokatit, raporton Kallxo.
Hashim Thaçi, Kadri Veseli, Rexhep Selimi dhe Jakup Krasniqi po mbahen në paraburgim në Hagë prej nëntorit të vitit 2020.
Ndaj tyre po rëndojnë akuza për krime lufte dhe krime kundër njerëzimit si përndjekje, burgosje, akte çnjerëzore, torturë, zhdukje dhe vrasje, si dhe me 4 pika për krime lufte si arrestim, ndalim arbitrar, torturë dhe vrasje të paligjshme.
