Në përballje me Prokurorinë Speciale, nën dyshimin se ka ligjëruar gjuhë të urrejtjes si imam, Shefqet Krasniqi ka ngelur i vetëm. Kundër tij është vënë edhe Kryesia e BIK-ut e udhëhequr nga Myftiu Naim Tërnava, konstatojnë dokumentet që ka siguruar Gazeta Express
Kështu, Kryesia e BIK-ut që drejtohet nga Myftiu Naim Tërnava, po bashkëpunon me Prokurorin Special Elez Blakaj, kundër imamit Krasniqi.
Në komunikimet në mes të Prokurorit dhe Kryesisë së BIK-ut, që i posedon Gazeta Express, këta të fundit konstatojnë që ligjëratat e Shefqet Krasniqit, që deri në fillim të këtij viti e ka drejtuar xhaminë kryesore në vend, xhaminë “Sulltan Fatih”- e njohur si Xhamia e Madhe në Prishtinë, janë në kundërshtim edhe me vetë parimet e fesë islame.
Prokurori Blakaj e kishte kërkuar një interpretim nga BIK-u në lidhje me ligjëratat e imamit Krasniqi të publikuara në YouTube më herët, ligjëratat “Revolucioni Sirian” dhe “Ndihmojeni Sirinë”, por edhe për materiale të tjera që i dërgoi në BIK.
BIK’u në përgjigjen e tyre për Prokurorin Special thonë se dy ligjëratat në fjalë “nuk janë në frymën parimore islame” dhe se interpretimi i pjesëve të ndryshme të librit të shenjtë islam, Kur’anit, është bërë jashtë kontekstit kohor.
BIK tutje konstaton se gjuha e përdorur nga imami Krasniqi nuk është në frymën e predikimit tradicional në vend dhe nuk përkon as me etikën e komunikimit me masën.
“Gjuha e vrazhdë gjatë predikimeve fetare nuk përkon me frymën pozitive të Kushtetutës, rregulloreve dhe akteve tjera normative të Bashkësisë Islame të Kosovës”, konstaton BIK dhe shkon madje edhe më tutje duke i thënë Prokurorit se Këshilli lokal i BIK në Prishtinë nën urdhërate e të cilit duhej të punonte imami tashmë nën hetime nuk ka dhënë leje që të publikohen këto ligjërata.
Këto ligjërata që i posedon Gazeta Express janë ndër ligjëratat e shumta ku Krasniqi përlotet, siç e kishte bërë ai zakon sa ishte imam në Xhaminë e Madhe duke qarë për çdo te premte. Por, ajo që i dallon këto ligjërata është edhe ilustrimi i tyre me krime bëra nga regjimi i Presidentit sirian, Bashar Al-Asad ndaj popullatës civile atje, që janë konsideruar edhe si nxitje që të rinjtë që e panë këtë ligjëratë drejtpërsëdrejti në xhami ose ata mijëra të tjerë në YouTube rrjete tjera sociale të i bashkoheshin rezistencës atje.
Express në gusht të këtij viti pati raportuar se një kërkesë për vazhdimin e hetimeve kundër imamit kontrovers Krasniqi ishte deponuar në Gjykatën Themelore të Prishtinës.
Në kërkesën që e pati siguruar Express Prokuroria përmend edhe persona të tjerë që janë pjesë e hetimit kundër grupit ku imami Krasniqi përket, përfshirë edhe drejtues OJQ’’sh islamike të mbyllura për aktivitete antikushtetuese dhe persona, Prokuroria lypte afat shtesë, derisa afati fillestar i planifikuar për hetimin e një vepre penale është dy vite, por me një mundësi vazhdimi edhe për gjashtë muaj shtesë, sipas kodit të procedurës penale.
Në verën e vitit 2014 Prokuroria e Kosovës kishte ngritur një pistë të gjerë hetimesh kundër kosovarëve të përfshirë në konfliktet e armatosura jashtë vendit, kryesisht në lëvizjen xhihadiste në Siri e Irak, përkrah organizatave terroriste si Shteti Islamik (ISIS) e “Xhabhatu Al-Nusra”- dega e Al’Kaedas në Siri.
Në kuadër të mbi 40 arrestimeve që ndodhën ato ditë, njësitet e specializuar të Policisë së Kosovës patën arrestuar edhe disa imamë të BIK’ut si Shefqet Krasniqi, Enes Goga, Eroll Nesimi, Idriz Bilibani, Zekirja Qazimi , Dardan Gjuka, Mazllam Mazllami, Bedri Robaj, Ekrem Avdiu, Enis Rama.
Pjesa më e madhe e tyre tashmë ose janë akuzuar, ose janë dënuar, siç është rasti i Zekirja Qazimit që Gjykata në Ferizaj e ka shpallur fajtor për veprime terroriste, për aktivitetin e kriminal të të cilit emisioni hulumtues i Zona Express pati transmetuar dokumentarin “Kampet e Zeza”.
Lidhjet e BIK’ut me terrorizmin shkojnë përtej arrestimit e dënimit të punonjësve të saj për veprime terroriste, lidhja me ISIS’in e “Xhabhatu al-Nusra’në”, ku një ish-imam i tyre, Ridvan Haqifi aktualisht udhëheq me krejt xhihadistët shqiptarë në ISIS është komandanti i tyre atje, dhe nga atje përmes një video ka kërcënuar me sulme edhe ndaj Kosovës.
Përfshirja e kosovarëve në konfliktin sektar në Siri e Irak i ka kushtuar vendit me mbi 300 qytetarë që direkt janë përfshirë në aktivitetet terroriste-pjesëmarrje në grupe terroriste, dhe me afro 60 prej të cilëve edhe kanë humbur jetën atje, sipas raporteve zyrtare të Qeverisë.
Së fundi edhe kosovarë të tjerë i janë bashkuar grupeve terroriste në Siri, kurse agjencitë lokale të sigurisë të ndihmuara nga agjencitë izraelite të sigurisë parandaluan një sulm të mundshëm terrorist të lojën e futbollit në mes të Shqipërisë e Izraelit.
Gazeta Express javë më parë ka publikuar identitetin e të gjithë anëtarëve të këtij grupi të dyshuar terroristësh 18 sosh, që dyshohet se janë të lidhur me këtë planifikim për sulm kandër kombëtares izraelite që aktualisht pjesa më e madhe e tyre janë në paraburgim. /GazetaExpress/.
