Dialogu ndërmjet Kosovës dhe Serbisë në nivelin më të lartë pritet të bëhet në fillim të muajit maj.
Siç merr vesh Telegrafi, kryeministri i Kosovës, Albin Kurti dhe presidenti i Serbisë, Aleksandar Vuçiq, pritet të takohen më 2 maj.
Takimi mes dyshes ende nuk është konfirmuar nga Qeveria e Kosovës e as nga ana e Bashkimit Evropian.
Por shefi i Politikës së Jashtme të Bashkimit Evropian, Josep Borrell ditë më parë përmes një postimi në Twitter kishte paralajmëruar takimin e radhës mes Kurtit dhe Vuçiqit.
Borrell kishte thënë se dyshja janë pajtuar rreth zbatimit të marrëveshjes dhe tashmë pritet nënshkrimi i deklaratës për të pagjeturit.
“Marrëveshja që ata arritën për tekstin e deklaratës për personat e zhdukur gjatë takimit të djeshëm të kryenegociatorëve është hapi i parë. Ne do ta miratojmë atë në nivel liderësh në takimin e ardhshëm të nivelit të lartë…”, kishte shkruar ai ditë më parë në Twitter.
Kosova dhe Serbia janë dakorduar për propozimin e Bashkimit Evropian dhe për zbatimin e aneks marrëveshjes. Ky takim që pritet të mbahet së shpejti mund të sjellë nënshkrimin për deklaratën për çështjen e personave të pagjetur.
Ndërkaq, Serbia dhe Kosova janë zotuar me Marrëveshjen për rrugën drejt normalizimit dhe aneksin e saj.
Zyrtarët e Bashkimit Evropian dhe të Shteteve të Bashkuara të Amerikës presin që të dyja palët të respektojnë të gjitha obligimet dhe të fillojnë zbatimi sa më shpejt.
