Shefi i Grupit Parlamentar të PDK-së, Abelard Tahiri u ka bërë thirrje kryeministrit Albin Kurti dhe ministrit të Shëndetësisë, Arben Vitia që sot të marrin pjesë në seancën e Kuvendit, ku do të diskutohet për pandeminë COVID-19.
Tahiri përmes një postimi në Facebook, ka shkruar se meqenëse pandemia është prioritet, Kurti e Vitia nuk do të duhej të kishin asnjë prioritet tjetër para pjesëmarrjes në seancë.
“Meqenëse pandemia është prioritet absolut për shkak rrezikut direkt që vjen me të, sot kryeministri Kurti dhe ministri i shëndetësisë Vitia, nuk do të duhej të kishin asnjë prioritet tjetër, para pjesëmarrjes në seancën e Kuvendit. Megjithëse e kanë ditur tashmë, nëse paraprakisht nuk e kanë vënë në agjendë, i ftoj që këtë ta bëjnë tani, në mënyrë që të vijnë në Kuvend e të ballafaqohen me përgjegjësitë e tyre”, ka shkruar Tahiri.
Ndryshe Kuvendi i Kosovës sot në orën 10:00 do të mbajë seancë ku në mesin e pikave të rendit të ditës është edhe debati parlamemtar për menaxhimin e pandemisë COVID-19.
