Sekretari Organizativ i Aleancës për Ardhmërinë e Kosovës ka kritikuar ashpër qasjen e Qeverisë Kurti ndaj arrestimit të ish-ushtarëve të UÇK-së në Maqedoninë e Veriut, duke e cilësuar si injorim të situatës shqetësuese.
“Arrestimi i ushtarëve të UÇK-së në Maqedoninë e Veriut është shqetësim që do duhej të alarmonte menjëherë Kryeministrin e Kosovës”, shkruan Gazmend Syla në reagimin e tij.
Ai thekson se përkundër kësaj situate të rëndë, kryeministri vazhdon me takime “vëllazërore” mes dy qeverive.
Zyrtari i lartë i AAK-së përmend edhe incidentet e fundit në RMV, duke përfshirë heqjen e tabelave në gjuhën shqipe dhe maltretimin e Presidentes së Kosovës.
“Tani e kuptojmë se për çfarë bashkimi kombëtar po flitet – për bashkëvëllazërimin e vjetër titist”, vlerëson Syla, duke shtuar se “ashtu siç vdiq Tito, do të shuhen edhe mbetjet e fundit të ideologjisë së tij”, ka thënë ai.
