Ushtruesi i detyrës së ministrit të Punëve të Brendshme, Xhelal Sveçla ka thënë se deputeti Behgjet Pacolli do të ndalohej e ndoshta edhe do të arrestohej, në rast se do të kthehej ilegalisht në Kosovë nga Tirana.
Ai nuk përjashtoi ndonjë masë edhe tash, nëse Pacolli thyen vetizolimin në shtëpinë e tij, duke shtuar se Pacolli do të ndalohej nëse të shtunën do të t’ia mësynte Kuvendit, ku pritej të mbahej seanca e jashtëzakonshme për votimin e Qeverisë Hoti. Këto deklarata Sveçla i bëri në emisionin “Interaktiv” në KTV.
E ndaj këtyre deklaratave ka reaguar Jetlir Zyberaj, këshilltari i Behgjet Pacollit, i cili tha se është i paprecedent deklarimi i ministrit Sveçla.
Zyberaj e quajti alarmante dhe të frikshme deklaratën e Sveçlës, duke kërkuar reagimin e kryetares së Kuvendit, Vjosa Osmani.
“I paprecedent deklarimi i ministrit Sveçla, se në rast të mbajtjes së seancës në Kuvend, shkuarja e zotit Pacolli aty si deputet, do të pasonte me arrestimin e tij. Alarmante dhe e frikshme kjo deklaratë. Si mund të arrestohet një deputet i zgjedhur nga populli veç pse i kryen obligimet kushtetuese? Reagimi i zonjës Vjosa Osmani është i nevojshëm dhe urgjent ndaj kësaj çmendurie me qellim frikësimi”, ka shkruar Zyberaj në Facebook.
