Ministri Xhelal Sveçla, ka shprehur “shqetësim për mos dorëzimin para drejtësisë të terroristëve që realizuan sulmin terrorist në Banjskë dhe strehimin që po ua bën Serbia, si një kërcënim i vazhdueshëm për sigurinë e Republikës së Kosovës”.
Sveçla sot ka pritur në takim, Sekretarin e Ministrisë së Brendshme Federale të Gjermanisë Bernd Krosser i cili ishte i shoqëruar nga ambasadori gjerman Jorn Rohde.
Sveçla gjatë takimit ka diskutuar edhe për sigurinë e përgjithshme, veçanërisht në veri.
“Sekretari Krosser falënderoi Ministrin për pritjen dhe përgëzoi për të arriturat. Ai po ashtu diskutoi edhe për Procesin e Berlinit, ku Republika e Kosovës mbetet palë aktive e këtij procesi. U diskutua po ashtu edhe Ministeriali i radhës i Ministrave të Brendshëm në kuadër të Procesit të Berlinit. Të dyja palët u dakorduan për bashkëpunim të mëtejmë, si garancë e sigurisë në rajon por edhe më gjerë.”, thuhet në njoftim.
