Ministri i Punëve të Brendshme, Xhelal Sveçla ka njoftuar se njësitet policore gjatë ditës së sotme në një lokacion në Komunën e Zubin Potokut kanë identifikuar dhe sekuestruar 20 pajisje të prodhimit të kriptovalutave.
Sveçla njofton se në koordinim me organet e drejtësisë dhe në zbatim të urdhëresave të tyre, Policia sot ka arrestuar në Leposaviq ish-zyrtarin policor Goran Savic i cili akuzohet për keqpërdorim të detyrës zyrtare gjatë vitit 2021. I njëjti, dyshohet të ketë sulmuar fizikisht edhe dy qytetarë serb.
” Pas trajtimit me sukses të një rasti të kalimit ilegal dhe zhvillimit të kontrabandës mbrëmë në pjesën veriore të vendit tonë, njësitet policore sot një lokacion në Komunën e Zubin Potokut kanë identifikuar dhe sekuestruar 20 pajisje të prodhimit të kriptovalutave”, ka shkruar ai.
Njoftimi i plotë:
Në kuadër të zbatimit të objektivave të saj strategjik, Policia e Kosovës po vazhdon pandalshëm angazhimin e saj në tërë territorin e Republikës së Kosovës.
Pas trajtimit me sukses të një rasti të kalimit ilegal dhe zhvillimit të kontrabandës mbrëmë në pjesën veriore të vendit tonë, njësitet policore sot një lokacion në Komunën e Zubin Potokut kanë identifikuar dhe sekuestruar 20 pajisje të prodhimit të kriptovalutave.
Në koordinim me organet e drejtësisë dhe në zbatim të urdhëresave të tyre, Policia sot ka arrestuar në Leposaviq ish-zyrtarin policor Goran Savic i cili akuzohet për keqpërdorim të detyrës zyrtare gjatë vitit 2021. I njejti, dyshohet të ketë sulmuar fizikisht edhe dy qytetarë serb.
Ditën e përmbyllim me lajmin e mirë që Policia jonë i është bashkuar kampanjës së EUROPOL #TheNetThatWorks, në kuadër të Ditës Ndërkombëtare të Bashkëpunimit Policor. Kjo nismë pjesë e së cilës është edhe Policia e Kosovës, synon promovimin e bashkëpunimit me qëllim të trajtimit të kërcënimeve kundër sigurisë, luftën kundër krimit të organizuar, atij kibernetik dhe terrorizmit.
Faleminderit pjesëtarëve të Policisë sonë që me punën e tyre profesionale garantojnë siguri, rend dhe ligj kudo në Republikën tonë!
