Policia suedeze i ka dhënë një leje një burri që ka planifikuar ta djegë një Kuran [libri i shenjtë i myslimanëve] pranë xhamisë kryesore në qendër të Stokholmit të mërkurën pasdite, në atë që mund të jetë shfaqja e parë e tillë që kur një e ngjashme çoi në prishje të negociatave me Turqinë për anëtarësimin e vendit nordik në NATO.
Leja iu dha një burri që ka fituar ankesat në gjykatë pasi kërkesat e tij të mëparshme për të djegur Kuranin jashtë ambasadës së Irakut në kryeqytetin suedez u refuzuan nga policia, raportoi transmetuesi TV4.
Nëse ngjarja zhvillohet siç është planifikuar jashtë xhamisë kryesore në ishullin Sodermalm në qendër të qytetit, do të ishte akti i parë publik i këtij lloji në Suedi që kur një ekstremist i së djathtës shkaktoi zhurmë në Turqi dhe vende të tjera myslimane duke djegur një kopje të përkthyer të Kuranit pranë ambasadës turke në Stokholm në janar.
Pas kësaj proteste, presidenti turk Recep Tayyip Erdogan përjashtoi mbështetjen e ofertës së Suedisë për të hyrë në Organizatën e Traktatit të Atlantikut të Veriut (NATO).
Policia suedeze në shumë raste u ka refuzuar lejet njerëzve që kanë thënë se po planifikonin të digjnin Kuranin, duke përmendur arsye sigurie, por vendimet e tyre janë hedhur poshtë nga gjykatat administrative që kanë argumentuar se tubimet publike dhe protestat duhet të kenë leje, përveç nëse paraqesin kërcënim për sigurinë publike.
Policia e Stokholmit ka thirrur përforcime nga pjesë të tjera të vendit për të ruajtur rendin gjatë protestës së planifikuar të mërkurën.