Ukraina mund të triumfojë në betejën e saj për t’i zmbrapsur forcat ruse me “mbështetjen e fuqishme” të aleatëve të vet, tha shefi i NATO-s Jens Stoltenberg të enjten në Pragë, ku janë mbledhur ministrat e Jashtëm të 32 vendeve anëtare të aleancës ushtarake për të biseduar për kornizën e ndihmës së re ushtarake për Kievin.
Në takimin e NATO-s në kryeqytetin çek, në të cilin po merr pjesë edhe sekretari amerikan i Shtetit, Antony Blinken, do të diskutohet për një paketë të ndihmës për Ukrainën, e cila do të paraqitet në samitin e NATO-s në Uashington në korrik.
Duke folur para takimit më 30 maj, Stoltenberg tha se tani është koha që vendet, të cilat e furnizojnë Kievin me ndihmë ushtarake, të bisedojnë për kufizimet që ia kanë vënë Ukrainës para më shumë se dy vjetëve, kur Moska e nisi pushtimin e plotë të saj.
Në muajt e fundit, Rusia ka kryer sulme të pareshtura ajrore dhe tokësore kundër Ukrainës, e cila po përballet me mungesë municioni.
Kievi i është lutur aleatëve ta përshpejtojnë dërgimin e municionit, si dhe ka kërkuar që t’i lejohet të përdorë armë me rreze të gjata veprimi – pasi e ka të kufizuar përdorimin e tyre brenda territorit të Rusisë.
