Jens Stoltenberg, sekretari i përgjithshëm i NATO-s, ka thënë se është i shqetësuar për tensionet dhe situatën që është e pranishme veri të Kosovës.
Ai, në Samitin e NATO-s në Vilnius të Lituanisë, ka deklaruar kështu kur u pyet se a do të takohet me presidentin serb, Aleksandar Vuçiq.
“Sigurisht që jam gati të takohem me Z.Vuçiq, jemi në kontakt të rregullt. Jemi të shqetësuar për rritjen e tensioneve në veri të Kosovës”.
“U bëjmë thirrje të gjitha palëve që të de-përshkallëzojnë situatën dhe të jenë të përmbajtura nga veprimet që mund të rrisin më tej tensionet në rajon”.
Stoltenberg ka thënë se NATO është duke e kryet në Kosovë mandatin e OKB-së në formë të paanshme.
“NATO është e pranishme në Kosovë, ne kemi KFOR-in që është atje për të garantuar siguri dhe stabilitet për Kosovën dhe njerëzit që jetojnë në Kosovë. NATO e ka shtuar numrin e disa trupave në KFOR për shkak të dhunës dhe tensioneve që kemi parë javët e fundit”, ka thënë Stoltenberg.
