Zhvillime të reja pritet të nisin të martën në kuadër të bisedimeve për dialogun mes Kosovës dhe Serbisë.
Nesër, në Bruksel, Bashkimi Evropian do t’i mbledhë në takim dy kryenegociatorët e palëve, zëvendëskryeministrin e Kosovës, Besnik Bislimi dhe drejtorin e të ashtuquajturës “Zyrë për Kosovën” në qeverinë e Serbisë, Petar Petkoviq.
Në lidhje me këtë takim, është deklaruar zëdhënësi i BE-së, Peter Stano.
Sipas Stanos, BE është e gatshme që të bëjë trysni mbi palët që të fillohet me procesin e implementimit të ujdisë së Ohrit, për të cilën ranë dakord dy liderët, Kurti dhe Vuçiq.
Ai deklaroi se pikërisht nesër, në takimin Bislimi-Petkoviq, do të diskutohen hapat e parë drejt zbatimit të marrëveshjes.
“Asnjë krizë nuk do të zgjidhet vetëm duke rënë dakord për diçka. Bëhet fjalë për zbatimin dhe Bashkimi Evropian është kaq i qartë dhe i vendosur për të bërë presion për fillimin e zbatimit. Kjo është arsyeja pse Bashkimi Evropian është kaq i qartë dhe kaq i vendosur për të bërë presion tek të dyja palët për të filluar me seriozitet zbatimin. Dhe kjo është ajo që do të ndodhë nesër në Bruksel. Hapat e parë në zbatim do të diskutohen dhe kjo është ajo që pret Bashkimi Evropian”, deklaroi Stano.
Kryeministri i Kosovës, Albin Kurti dhe presidenti i Serbisë, Aleksandar Vuçiq, më 18 mars, në Ohër, u dakorduan për marrëveshjen me bazë propozimin evropian, i cili i hap rrugë normalizimit të raporteve mes dy shteteve.
Marrëveshja drejt normalizimit, ndër të tjera, parasheh respektimin e ndërsjellë të pavarësisë, autonomisë dhe integritetin territorial, por nuk përmend në mënyrë specifike njohjen e pavarësisë së Kosovës nga Serbia.
Serbia merr përsipër të mos bllokojë anëtarësimin e Kosovës në organizatat ndërkombëtare, ndërkaq marrëveshja parasheh edhe njohjen reciproke të targave, simboleve, dokumenteve, diplomave dhe vulave doganore.
Gjithashtu, në marrëveshje është paraparë edhe një “aranzhim i veçantë për komunitetin serb në Kosovë”, gjegjësisht, një nivel i caktuar i vetëmenaxhimit.
Ky propozim është mbështetur nga vendet perëndimore, përfshirë Shtetet e Bashkuara të Amerikës.
