Zëdhënësi i BE-së, Peter Stano u bëri thirrje sot autoriteteve të Kosovës që të konsultohen dhe të përmbahen nga lëvizjet e njëanshme.
Stano tha se gjatë javës së kaluar janë parë të paktën dy shembuj të veprimeve që kanë shkaktuar shqetësimin e BE-së.
“Një ishte vendimi i BQK-së, e tjetri veprimi i Policisë së Kosovës në disa subjekte serbe në veri të Kosovës, jo e koordinuar por e njëanshme pa nivelin e nevojshëm të konsultimit për të parandaluar një ndikim negativ tek njerëzit në terren. BE-ja lëshoi një deklaratë javën e kaluar, ju keni parë edhe deklaratën e KE-së, si dhe të partnerëve ndërkombëtarë, duke u shqetësuar se këto lëvizje të njëanshme çojnë në diçka që nuk duam ta shohim, një përkeqësim të situatës në terren”, tha Stano.
Zëdhënësi i Bashkimit Evropian theksoi edhe një herë se është e rëndësishme t’i rikthehet dialogut nën patronazhin e Brukselit.
“Përfaqësuesi i Lartë Lajçak po punon shumë me partnerët në rajon dhe BE-në dhe komunitetin më të gjerë ndërkombëtar. Të dyja palët duhet të fillojnë të sillen në mënyrë konstruktive dhe të kthehen në tryezën e bisedimeve dhe të diskutojnë çështje të rëndësishme, pa lëvizje të njëanshme. Tani, nuk jam në gjendje të njoftoj një datë për disa aktivitete të ardhshme, por shpresojmë se në një moment do të jemi në gjendje të shpallim një takim të nivelit të lartë, që zakonisht është takim i Kryeministrit dhe Presidentit, nga Kosova dhe nga Serbia. Nuk kam çfarë të njoftoj tani, realisht apelojmë, në këtë rast, autoritetet e Kosovës që të hyjnë në procesin e konsultimit dhe të shmangin lëvizjet e njëanshme sepse ato kanë pasoja kundërproduktive”, tha Stano.