Kryeministri i Kosovës, Albin Kurti është deklaruar sërish rreth sulmit terrorist të së dielës, duke thënë se kjo nuk ishte një “rezistencë civile apo veprim i bandave”, por sulm i “formacioneve të armatosura paraushtarake të pajisura dhe të përgatitura nga Beogradi”.
Kurti në një paraqitje në “Al Jazeera”, citohet të ketë thënë se “riagresioni nuk është i përjashtuar”, pasi sipas tij Serbia dëshiroi të fillojë një luftë të dielen.
Kryeministri po ashtu ka deklaruar që presidenti serb, Aleksandër Vuçiq dhe ish-nënkryetari i Listës Serbe, Milan Radoiçiq janë “Sllobodan Millosheviq dhe Arkan”.
“Vuçiq dëshiron një luftë tjetër dhe një gjenocid tjetër, sepse ai dëshiron Republikën Srpska në Kosovë.” – ka thënë ai.
Ndryshe, në një akt terrorist, një formacion prej 30 personave të armatosur rëndë sulmuan sulmuan Policinë e Kosovës në fshatin Banjska të dielën. Nga ky sulm, një polic i Kosovës mbeti i vrarë e dy të tjerë të plagosur.
Autoritetet e Kosovës njoftuan vdekjen e tre terroristëve të dielën, më pas më 25 shtator u konfirmua se ishte zbuluar trupi i një sulmuesi të katërt. Gjashtë persona janë arrestuar po ashtu.
Ndërkohë, Policia e Kosovës përgjatë gati një javë tashmë zhvilloi aksione për neutralizimin e këtij grupi.
Aktualisht, gjendja në veri është e qetë pas sulmit terrorist të së dielës nga persona të armatosur rëndë.
