Më 26 dhjetor, ish-kryeministri Sali Berisha do të ketë një tjetër betejë me Gjykatën e Posaçme, e cila e caktoi atë si datën kur do të shqyrtojë kërkesën e SPAK për ashpërsimin e masës së sigurisë ndaj tij.
Pas administrimit të shkresës së Kuvendit që njoftoi pasditen e së enjtes se Berisha nuk ka më imunitet, SPAK dorëzoi këtë të premte kërkesën për zëvendësimin e masës së sigurisë, nga ajo e detyrimit për t’u paraqitur, në atë të arrestit shtëpiak, shkruan TV Klan.
Gjyqtarja Irena Gjoka, e kontestuar disa herë nga avokatët e Berishës, ftoi të dyja palët, SPAK dhe Berishën me përfaqësuesit e tij ligjorë, që në orën 10:00 të kësaj date të paraqiten në Gjykatën e Posaçme për të bërë parashtrimet e tyre.
Prokuroria e Posaçme kërkon ashpërsimin e masës me argumentin se ish-kryeministri Sali Berisha, nuk zbatoi në mënyrë të përsëritur masën e sigurisë “Detyrim për t’u paraqitur” caktuar në Tetor nga e njëjta gjykatë.
Por nga tjetër, Berisha dhe avokatët e tij pretendojnë se nuk mund të zbatohej një masë sigurimi e dalë nga një vendim antikushtetues, sa kohë nuk u kërkua leje nga Kuvendi. Ky vendim i SPAK-ut u dërgua edhe në Gjykatën Kushtetuese, por ajo nuk e mori në shqyrtim.
SPAK po e heton Berishën me dyshimet se është përfshirë në korrupsion në procedurën e privatizimit të ish-kompleksit sportiv “Partizani”.
