15 shtatori është Dita Ndërkombëtare e Demokracisë.
Sipas Kombeve të Bashkuara, demokracia është një “vlerë universale që bazohet në shprehjen e lirë të vullnetit të njerëzve për të përcaktuar sistemet e tyre politike, ekonomike, sociale dhe kulturore, si dhe ndikimin që ato kanë në të gjitha aspektet e jetëve të tyre.”
Me rastin e kësaj dite, Kuvendi i Kosovës do të mbajë disa aktivitete duke filluar nga ora 10:00, ku do të ketë fjalime të Glauk Konjufca, kryetar i Kuvendit, Nancy Soderberg, drejtore e NDI-së për Kosovë dhe Arnhild Spence – koordinatore e UNKT-së për Kosovë.
Po ashtu do të mbahen edhe panairi i organizatave të shoqërisë civile, gara e shahut nga persona të verbër dhe tryeza “Të ruhen dhe promovohen parimet e demokracisë”.
Dita Ndërkombëtare të Demokracisë është përcaktuar në vitin 2007, me rezolutën e Asamblesë së Përgjithshme të Kombeve të Bashkuara, e cila inkurajon qeveritë të forcojnë programet kombëtare për promovimin dhe konsolidimin e demokracisë.