Zëvendëskryeministri Besnik Bislimi pas kthimit nga Brukseli ku ka qëndruar bashkë me Kryeministrin Kurti e ku kanë takuar palën serbe ka zbuluar detaje të ceremonisë së nënshkrimit të marrëveshjes nëse ajo ndodh. Sipas tij, marrëveshja me palën serbe do të nënshkruhej në praninë e 27 liderëve të BE’së.
Emisari i BE-së për dialogun Kosovë-Serbi, Miroslav Lajçak, në deklaratat e tij për përpjekjet që po bën Unioni për të gjetur zgjidhje në pikën më të nxehtë të palëve, Asociacionin, pati treguar se ka marrë në dorë analizimin e 15 modeleve të mbrojtjes së pakicave në tryezën e tij në Bruksel.
Tash pas dakordimit të arritur të hënën se janë pajtuar me propozimin europian, Lajçak ka dërguar modelet në tryezën e kryeministrit Kurti.
Për këtë ka folur zëvendëskryeministri Besnik Bislimi, i cili tregoi pak për atë se si janë këto modele, por tha se Kosova dhe Serbia do të kenë më pak probleme pas kësaj marrëveshje.
“Ne duhet të shohim se cili model na përshtatet, ne nuk do të kopjomë. Ka modele të cilat logjikisht nuk mund të implementohen në Kosovë, e që janë zhvilluar për ishuj”, tha ai.
Në janar, Lajçak kishte folur për këto modele, derisa garantonte se “nuk do të shkruani diçka me të cilën nuk do të pajtoheni”.
“Ka modele ekzistuese modele europiane funksionale. Unë kam 15 analiza të mbrojtjes së pakicave në tryezën time në Bruksel. Disa prej këtyre modeleve ndoshta s’keni dëgjuar për to. Asnjë nga to nuk ka shkaktuar jofunksionalitet ku zbatohet ky model. Kosova e ka dërguar aplikacionin për Këshill të Europës. KiE ka një kornizë të shkëlqyer ligjore për ta adresuar këtë çështje. Mos u frikësoni nga diçka që ju do ta hartoni, kjo është çfarë dua të them”, kishte thënë Lajçak
Ai gjithashtu ka thënë se filozofia e tij është kundër krijimit të diçka që asnjëherë nuk është provuar diku tjetër më parë.
“Të sigurohemi që çdo gjë që propozojmë bazohet në modelet ekzistuese dhe që funksionojnë mirë”.
Për aplikimin e modeleve ekzistuese në themelimin e Asociacionit të komunave me shumicë serbe pati folur edhe emisari amerikan, Gabriel Escobar.
Më 5 gusht të vitit të kaluar, gjatë një bisede me gazetarët, Escobar pati thënë se praktikat që mbrojnë trashëgiminë dhe gjuhën amtare të minoriteteve – pa shkelur Kushtetutën e shtetit ku jetojnë – ndoshta mund të përdoren “si udhëzues për të zbatuar Asociacionin”.
Kryeministri Kurti pas takimit trilateral në Bruksel tha se ishte i gatshëm të nënshkruante marrëveshjen ku parashihet edhe zbatimi i marrëveshjeve të kaluara. Por, ai tha se nënshkrimi nuk ndodhi për shkak të refuzimit të presidentit serb, Vuçiq.
Ndërkaq, Bislimi, duke njoftuar se takimi i radhës i nivelit të lartë do të jetë më 18 mars në të cilin do të diskutohet për një dokument të përbashkët të aneksit, tha se në momentin kur palët pajtohen, Bashkimi Europian do të marrë përsipër procedurat e nënshkrimit apo finalizimit.
Këtu Bislimi paralajmëroi një ceremoni ku do të jenë pjesëmarrës të 27 kryeministrat e shteteve të BE-së.
“Kjo është ideja apo plani, këtë duhet ta aranzhon z.Borell”, tha ai.